Uddhav Thackeray :निवडणूक आयोगाबाबत इंडियन एक्सप्रेसने मोठा गौप्यस्फोट केला आहे. निवडणूक आयोगात एकवाक्यता नसल्याचं समोर आलं आहे. मुख्य निवडणूक आयुक्त ज्ञानेश कुमार यांच्या काही निर्णयांवर दोन्ही निवडणूक आयुक्तांनी काही आक्षेप घेतले होते.
निवडणूक आयोगाबाबत इंडियन एक्सप्रेसने मोठा गौप्यस्फोट केला आहे. निवडणूक आयोगात एकवाक्यता नसल्याचं समोर आलं आहे. मुख्य निवडणूक आयुक्त ज्ञानेश कुमार यांच्या काही निर्णयांवर दोन्ही निवडणूक आयुक्तांनी काही आक्षेप घेतले होते. ही बाब समोर येताच काँग्रेसने आज पत्रकार परिषद घेऊन दिल्ली आणि हरियाणातील विधानसभेच्या झालेल्या निवडणुका रद्द करा, अशी मागणी केली आहे. उद्धव ठाकरे यांनी सुद्धा आज पत्रकार परिषद घेऊन मुख्य निवडणूक आयुक्तांवर प्रश्नचिन्ह निर्माण केलं. “देशांतर्गत, पक्षांतर्गत लोकशाही कशी राबवली जाते की नाही हे बघणारा निवडणूक आयुक्त नेमणुकीद्वारे नेमला जातो. त्याची निवडणूक का होत नाही?. मग हा कोणाच्या मर्जीने नेमला जातो? कोण नेमतो याला? मर्जीने याची नेमणूक होत असेल तर त्यांच्या घरचं पाणी भरणार. तो पाणी भरताना इतकं पाणी भरतोय की त्यात देशाची लोकशाही बुडतेय” असं उद्धव ठाकरे म्हणाले.
“मी निवडणूक आयोगाला धन्यवाद देतो. सुखबीर संधू आणि विवेक जोशी यांना, तुम्ही धाडसं दाखवलं. आता तुमच्या लक्षाय येत असेल, म्हणून मी विचारलं, तुम्ही सगळे चॅनलवाले पत्रकार परिषदा दाखवता का? चॅनलने त्या भयातून बाहेर येणं गरजेचं आहे. आता जनता रस्त्यावर उतरली तर मात्र काही सांगता येत नाही. तुम्ही लोकशाहीचे आधारस्तंभ आहात. लोकशाहीचा होत असलेला हा खून, पक्ष फोडणारी दरोडेखोरांची टोळी याचा पर्दाफाश जनतेसमोर आला पाहिजे” असं उद्धव ठाकरे यांनी म्हटलं.