राजापूर विधानसभा मतदारसंघाचे माजी आमदार आणि शिवसेना (उद्धव ठाकरे गट) नेते राजन साळवी यांनी अखेर उद्धव ठाकरे गटाला सोडचिठ्ठी देत मुख्यमंत्री एकनाथ शिंदे यांच्या नेतृत्वाखालील शिवसेनेत प्रवेश करण्याचा निर्णय घेतला आहे. आज दुपारी तीन वाजता हा प्रवेश होणार आहे, ज्यामुळे ठाकरे गटाला मोठा धक्का बसला आहे.
यासंदर्भात माजी खासदार विनायक राऊत यांनी साळवींवर कठोर शब्दांत टीका केली आहे. त्यांनी आरोप केला की, पराभवानंतर साळवी भाजपमध्ये जाण्याचा प्रयत्न करत होते, परंतु त्यांना तिथे संधी मिळाली नाही. त्यामुळे शेवटी त्यांना शिवसेना (शिंदे गट) मध्ये प्रवेश करावा लागला.
पराभवानंतर पक्षांतराचा निर्णय?
विनायक राऊत यांच्या मते, पराभवानंतर अवघ्या दोन-तीन दिवसांत साळवींनी मतदारसंघात फिरून आपल्या समर्थकांना भाजपमध्ये प्रवेश करण्याची इच्छा व्यक्त केली होती. मात्र, भाजपने त्यांच्यासाठी दरवाजे बंद ठेवले. त्यांनी दावा केला की, भाजप नेते आणि उपमुख्यमंत्री देवेंद्र फडणवीस यांनीही साळवींना कधीच भेट दिली नाही. त्यामुळे त्यांना अखेर त्यांच्याशी राजकीय मतभेद असलेल्या सामंत कुटुंबाच्या पक्षात प्रवेश करावा लागला.
साळवींच्या राजकीय कारकिर्दीवर टीका
विनायक राऊत यांनी साळवींवर निशाणा साधत म्हटले की, भाजपला त्यांची ताकद माहीत असल्यामुळेच त्यांना पक्षात स्थान मिळाले नाही. ते म्हणाले, “प्रत्येक निवडणुकीत कोणाच्या तरी पाठीत खंजीर खुपसणे ही त्यांची सवय आहे. उदय सामंत यांचा राजकीय उदयही साळवींनी केलेल्या गद्दारीमुळे झाला होता.”
याशिवाय, भाजप आमदार निलेश राणे यांनी वर्षभरापूर्वीच साळवींवर गंभीर आरोप केले होते. लोकसभा निवडणुकीवेळी त्यांनी प्रतिस्पर्ध्यांकडून आर्थिक लाभ घेतल्याचा आरोप करण्यात आला होता. त्यामुळे भाजपने त्यांच्यावर कधीही विश्वास टाकला नाही, असेही राऊत यांनी स्पष्ट केले.
सत्तेची लालसा कारणीभूत?
साळवी हे कट्टर शिवसैनिक मानले जात होते, मग त्यांनी ठाकरे गटाचा त्याग का केला, असा प्रश्न विचारला असता, राऊत म्हणाले, “सत्तेची आणि ठेकेदारीची लालसा वाढली की, अशा प्रकारची चुकीची गणिते मांडली जातात. साळवींनीही स्वार्थासाठी हा निर्णय घेतला आहे.”
राजन साळवींनी घेतलेल्या या निर्णयामुळे कोकणातील राजकीय समीकरणांवर मोठा प्रभाव पडणार आहे. आता त्यांची पुढील वाटचाल कितपत प्रभावी ठरेल, हे पाहणे महत्त्वाचे ठरेल.