मुंबईत सध्या भाषिक वादाचा विषय तापला आहे. याच पार्श्वभूमीवर शिवसेना (उद्धव बाळासाहेब ठाकरे गट) नेते आणि खासदार संजय राऊत यांनी एक मोठं विधान केलं आहे. त्यांनी स्पष्टपणे सांगितलं की, महाराष्ट्र आणि मराठी भाषा यांना हिंदी नव्हे तर गुजराती लोकांकडून सर्वात मोठा धोका आहे.
नुकत्याच पार पडलेल्या पत्रकार परिषदेत संजय राऊत यांनी मनसेवर नाव न घेता जोरदार टीका केली. त्यांनी असा आरोप केला की, मुंबई महापालिका निवडणुकीला लक्ष ठेवून मराठी, हिंदी आणि इतर भाषांवरून कृत्रिम वाद निर्माण केले जात आहेत. यामागे काही ठराविक गटांचा हात असल्याचा दावाही त्यांनी केला. यावेळी त्यांनी “सागर बंगला”चा संदर्भ देत अप्रत्यक्षपणे मनसेवर निशाणा साधला.
राऊत म्हणाले की, हिंदी सक्तीचा वाद फक्त शैक्षणिक धोरणापुरता आहे, परंतु याचा राजकीय वापर सुरू आहे. मराठी भाषा ही आपली आई आहे, तर इतर भाषा या मावश्या आहेत, असंही त्यांनी स्पष्ट केलं. “भाषेची सक्ती करायची नाही, जसं दक्षिण भारतात राजकीय नेतृत्व मजबूत आहे, तसंच इथेही पाहिजे. पण आमचे काही नेते अजूनही गुलामगिरीत अडकले आहेत,” असा घणाघात त्यांनी केला.
संजय राऊत यांनी गुजराती समाजाच्या वाढत्या प्रभावावर चिंता व्यक्त केली. त्यांनी सांगितलं की, संपूर्ण पश्चिम मुंबईचं गुजरातीकरण झालं आहे. घाटकोपरसारख्या भागात गुजराती भाषेला जास्त प्राधान्य दिलं जातं, आणि यावर कोणीही उघडपणे बोलत नाही, कारण भाजपाला दुखवायचं नाही, अशी टीका त्यांनी केली.
राज ठाकरे आणि एकनाथ शिंदे यांच्यावर निशाणा साधताना राऊत म्हणाले, “जे लोक मोदी आणि शहांशी हिंदीत बोलतात, त्यांनी इतर भाषांबाबत बोलू नये. ज्यांचं इंग्रजी कमजोर आहे, त्यांना हिंदीचा आधार घ्यावा लागतो.”
संघाचे ज्येष्ठ नेते भैय्याजी जोशी यांनी नुकतीच मुंबईतील विविध भाषिक गटांबाबत एक टिप्पणी केली होती. त्यानंतर भाषिक अस्मितेचा वाद चिघळला आहे. या वादाच्या पार्श्वभूमीवर संजय राऊतांनी दिलेलं विधान अधिकच गडद झालं आहे.
राऊत यांनी स्पष्ट केलं की, मुंबईत मराठी टिकवण्यासाठी सर्वांनी एकत्र येणं गरजेचं आहे. राजकीय फायद्यासाठी भाषेचा वापर थांबवायला हवा, असंही त्यांनी निक्षून सांगितलं.
सध्या मुंबईच्या महापालिका निवडणुकीच्या पार्श्वभूमीवर भाषिक वादाचा मुद्दा किती तापतो आणि त्याचे राजकीय परिणाम काय होतात, हे पाहणं औत्सुक्याचं ठरणार आहे.