राज ठाकरे यांनी गंगेच्या प्रदूषणावर तीव्र शब्दांत टीका करताच, राजकीय वर्तुळात नव्या चर्चेला सुरुवात झाली आहे. कुंभमेळा संपला असला तरी या विषयावरून शिवसेना आणि भाजप नेत्यांमध्ये मतभेद निर्माण झाले आहेत.
गंगा स्वच्छतेवर प्रश्नचिन्ह
राज ठाकरे यांनी “अरे हाड… कोण पिणार ते पाणी?” अशा शब्दांत गंगाजलाच्या शुद्धतेवर प्रश्न उपस्थित केला. त्यांच्या एका सहकाऱ्याने गंगाजल आणले असता, त्यांनी ते प्राशन करण्यास नकार दिला आणि गंगेत वाढलेल्या प्रदूषणावर तीव्र नाराजी व्यक्त केली.
भाजपवर अप्रत्यक्ष निशाणा
राज ठाकरे यांनी गंगा स्वच्छता मोहिमेवर अप्रत्यक्षपणे प्रश्नचिन्ह उपस्थित करत म्हटलं, “गंगा स्वच्छ करण्यासाठी मोठमोठ्या घोषणा झाल्या, पण प्रत्यक्षात काही बदल दिसत नाहीत.” त्यांनी यावेळी “राम तेरी गंगा मैली” या चित्रपटाचं उदाहरण देत श्रद्धा आणि अंधश्रद्धेबाबत जनतेला विचार करण्याचं आवाहन केलं.
“राज कपूर यांनी चित्रपट काढला आणि लोकांना वाटलं की गंगा खरंच स्वच्छ होणार! पण गंगा आजही तशीच आहे. अंधश्रद्धेतून बाहेर पडा, थोडं डोकं वापरा!” असं ठाकरे म्हणाले.
शिवसेना आक्रमक, भाजप सावध
या वक्तव्यावर शिवसेनेने तीव्र प्रतिक्रिया देत राज ठाकरेंवर टीका केली आहे, तर भाजपने मात्र संयमी भूमिका घेतली आहे. भाजप नेत्यांनी “राज ठाकरेंच्या विधानांवर आम्ही भाष्य करणार नाही” अशी भूमिका घेत वाद टाळण्याचा प्रयत्न केला आहे.
राज ठाकरेंच्या या विधानांमुळे राजकीय वातावरण तापण्याची शक्यता असून, यावर पुढे कोणती प्रतिक्रिया उमटते हे पाहणं महत्त्वाचं ठरणार आहे.