मस्साजोग गावचे सरपंच संतोष देशमुख यांच्या निर्घृण हत्येनंतर राज्यभर संतापाची लाट उसळली आहे. या घटनेनंतर धनंजय देशमुख यांनी भावनिक प्रतिक्रिया देत आरोपींना कठोरात कठोर शिक्षा व्हावी, अशी मागणी केली आहे.
हत्येचे फोटो व्हायरल, राज्यभर संताप
गेल्या दोन दिवसांपासून संतोष देशमुख यांच्या हत्येचे फोटो समाजमाध्यमांवर झपाट्याने पसरत आहेत. या अमानुष हत्याकांडामुळे लोकांमध्ये तीव्र संताप व्यक्त होत आहे. या प्रकरणामुळे दबाव वाढल्यानंतर धनंजय मुंडे यांना मंत्रीपदाचा राजीनामा द्यावा लागला आहे.
“आरोपींना भर चौकात सोडा” – धनंजय देशमुख
या संपूर्ण घटनेबाबत धनंजय देशमुख यांनी आपली वेदना व्यक्त केली. त्यांनी स्पष्ट शब्दांत सांगितले की, “आरोपींना भर चौकात सोडले पाहिजे, समाज त्यांना योग्य ती शिक्षा देईल. या गुन्हेगारांना कुठलाही जात-धर्म नाही, त्यांना शिक्षा मिळालीच पाहिजे.”
खून कोणी घडवून आणला? मोठा सवाल!
धनंजय देशमुख यांनी असा आरोप केला की, या घटनेत केवळ आरोपीच नव्हे, तर त्यांना कुणीतरी सुचना दिल्या असतील. “या हत्येसाठी आरोपींना कुणीतरी ट्रेनिंग दिलं आहे का? यामागे मोठा कट आहे का?” असे सवाल त्यांनी उपस्थित केले.
“न्याय हवा, पोलीस यंत्रणाही दबावाखाली?”
देशमुख यांनी या प्रकरणातील तपासावरही प्रश्नचिन्ह उपस्थित केले. “पोलीस यंत्रणा योग्य प्रकारे काम करत आहे का? आरोपींना कोणाचे पाठबळ आहे का?” असे ते म्हणाले. या प्रकरणात संपूर्ण समाजाचा सहभाग आवश्यक असून, सरकारने कठोर भूमिका घेतली पाहिजे, असेही त्यांनी स्पष्ट केले.
सरकार आणि न्यायसंस्थेकडून कठोर कारवाईची मागणी
या घटनेनंतर स्थानिक नागरिकांत अस्वस्थता निर्माण झाली आहे. आरोपींना वेगळी शिक्षा देण्यात यावी आणि भविष्यात अशा घटनांना आळा बसावा, यासाठी कठोर पावले उचलावीत, अशी मागणी होत आहे.
राज्यातील गुन्हेगारी नियंत्रणात ठेवण्यासाठी सरकारने तातडीने पावले उचलणे गरजेचे आहे, असे नागरिकांनीही व्यक्त केले आहे. आता सरकार आणि न्यायसंस्थेची भूमिका काय असेल, याकडे संपूर्ण महाराष्ट्राचे लक्ष लागले आहे.