बीड : मस्साजोग गावचे सरपंच संतोष देशमुख यांच्या निर्घृण हत्येचे फोटो आणि व्हिडिओ समोर आल्याने संपूर्ण राज्यभर संतापाची लाट उसळली आहे. या प्रकरणावर राजकीय वातावरण तापले असून, सरकारवर तीव्र टीका होत आहे. विरोधकांनी महायुती सरकारला धारेवर धरत गृहखात्याच्या भूमिकेवरही प्रश्न उपस्थित केले आहेत.
रोहित पवारांचा संताप – सरकारवर घणाघाती आरोप
राष्ट्रवादी काँग्रेसचे आमदार रोहित पवार यांनी या घटनेवर तीव्र प्रतिक्रिया देत सरकारला जाब विचारला आहे. “राज्यात गुंडांनी कायदा-सुव्यवस्थेचा पुरता खेळखंडोबा केला आहे. संतोष देशमुख यांच्या हत्येचे व्हिडिओ आणि फोटो दोन महिने आधीच वरिष्ठ नेत्यांकडे पोहोचले होते, तरीही आरोपींवर कठोर कारवाई झाली नाही,” असा आरोप त्यांनी केला.
त्यांनी मुख्यमंत्री देवेंद्र फडणवीस आणि उपमुख्यमंत्री अजित पवार यांच्यावरही निशाणा साधत म्हटले, “संबंध, मैत्री सगळं बाजूला ठेवा, पण आजच्या आज धनंजय मुंडेंचा राजीनामा घेतला पाहिजे. आरोपींना व्हीआयपी ट्रीटमेंट मिळत आहे, त्यामुळे सरकार आरोपींची पाठराखण करत असल्याचा संशय लोकांना येत आहे.”
धनंजय मुंडेंच्या राजीनाम्यासाठी विरोधक आक्रमक
या प्रकरणामुळे धनंजय मुंडेंच्या राजीनाम्याची मागणी जोर धरू लागली आहे. रोहित पवार यांनी थेट अजित पवार यांना उद्देशून म्हटले, “तुमच्यात निर्णय घेण्याची धमक आहे, त्यामुळे अधिवेशन सुरू होण्यापूर्वी धनंजय मुंडेंचा राजीनामा घेतला पाहिजे.”
तसेच, त्यांनी पंकजा मुंडे यांनाही आवाहन करत या मुद्द्यावर त्यांची भूमिका स्पष्ट करण्यास सांगितले. “थोरले मुंडे असते, तर त्यांनी धनंजय मुंडेंना चाबकाने फोडले असते,” अशी जळजळीत टीका करत रोहित पवार यांनी सरकारवर जोरदार हल्लाबोल केला.
सरकारकडून निर्णयाची प्रतीक्षा
या प्रकरणावर सरकारकडून कोणता निर्णय घेतला जातो, याकडे संपूर्ण राज्याचे लक्ष लागले आहे. आरोपींना कठोर शिक्षा होईल का? धनंजय मुंडे राजीनामा देतील का? हे पाहणे महत्त्वाचे ठरणार आहे.