बीड जिल्ह्यातील मस्साजोग गावातील सरपंच संतोष देशमुख यांच्या निर्घृण हत्येचे तीन महिने उलटून गेले, तरी अद्याप एक आरोपी फरार आहे. या हत्येचे भीषण फोटो आणि व्हिडिओ सोशल मीडियावर व्हायरल झाल्यानंतर संतापाची लाट उसळली आहे. स्थानिक नागरिक आणि राजकीय नेत्यांनी आरोपींना कठोर शिक्षा देण्याची मागणी केली आहे. या घटनेमुळे बीडमध्ये ४ मार्च रोजी बंद पुकारण्यात आला आहे.
“हे फोटो पाहून काळजात धस्स होतं” – खासदार बजरंग सोनावणे
या घटनेवर प्रतिक्रिया देताना बीडचे खासदार बजरंग सोनावणे यांनी सरकारला जाब विचारला आहे. ते म्हणाले, “हे फोटो पाहून कोणाच्याही काळजात धडकी भरेल. हत्येनंतरही आरोपी हसत होते, हे पाहून संताप वाढतो. अशा गुन्हेगारांना तात्काळ शिक्षा झाली पाहिजे.”
तसेच, त्यांनी मुख्यमंत्री देवेंद्र फडणवीस यांना उद्देशून प्रश्न केला, “धनंजय मुंडेंचा राजीनामा घेण्यास इतका वेळ का लागला? एवढ्या मोठ्या गुन्ह्यानंतर त्वरित निर्णय होणे गरजेचे होते.”
राजकीय हालचाली आणि सरकारची भूमिका
या प्रकरणावरून राज्यातील राजकीय वातावरण चांगलेच तापले आहे. काल रात्री देवगिरी बंगल्यावर झालेल्या उच्चस्तरीय बैठकीत मुख्यमंत्री देवेंद्र फडणवीस, उपमुख्यमंत्री अजित पवार आणि धनंजय मुंडे यांच्यासह अनेक वरिष्ठ नेते उपस्थित होते. या बैठकीत संतोष देशमुख हत्या प्रकरणाची सखोल चर्चा झाली असून, धनंजय मुंडे यांना राजीनामा देण्याच्या सूचना देण्यात आल्याची माहिती समोर आली आहे.
“सरकार संवेदनशीलतेने निर्णय घेईल का?”
बजरंग सोनावणे यांनी सरकारच्या भूमिकेवर टीका करत म्हणाले, “त्या कुटुंबाची अवस्था विचार करा. एवढ्या मोठ्या घटनेनंतरही जर सरकार संवेदनशील नसेल, तर हे अत्यंत दुर्दैवी आहे. न्यायासाठी आम्ही लढा देणारच.”
राजकीय हालचालींना वेग आल्याने आता पुढील निर्णय काय होतो, याकडे संपूर्ण राज्याचे लक्ष लागले आहे.