महाराष्ट्रातील महायुती सरकारच्या मंत्रिमंडळ विस्तारावरून अनेक नेते नाराज असल्याचे चित्र दिसत आहे. राष्ट्रवादी काँग्रेस पक्षाचे ज्येष्ठ नेते आणि माजी मंत्री छगन भुजबळ यांना यावेळी मंत्रिमंडळात स्थान देण्यात आले नाही. त्यामुळे त्यांनी वेळोवेळी नाराजी व्यक्त केली होती.
“माझी इच्छा नाही पुन्हा तेच-तेच बोलण्याची” – भुजबळ
एका पत्रकार परिषदेत छगन भुजबळ यांना त्यांच्या मंत्रिपद न मिळाल्याबाबत विचारले असता त्यांनी थोड्या संतप्त स्वरात प्रतिक्रिया दिली. “जहाँ नहीं चैना, वही नहीं… मग मी काय करू? इकडेच राहायचं आहे ना! मी जे काही बोलायचं ते आधीच बोलून झालं आहे. पुन्हा त्याच विषयावर चर्चा करण्याची मला इच्छा नाही,” असे त्यांनी स्पष्ट केले.
विरोधकांचा सरकारवर हल्लाबोल
भुजबळांच्या या विधानावर विरोधी पक्षांनी आक्रमक भूमिका घेतली आहे. सभागृहात विरोधकांनी सरकारला या संदर्भात प्रश्न विचारले. मात्र, यावर प्रतिक्रिया देताना भुजबळ म्हणाले, “विरोधकांनी काही प्रश्न विचारले असतील तर त्यावर सरकार उत्तर देईल.”
महायुती सरकारमध्ये अंतर्गत मतभेद वाढत असल्याचे चित्र निर्माण झाले असून, पुढील राजकीय घडामोडींकडे सगळ्यांचे लक्ष लागले आहे.