ठाण्यात शिवसेना शिंदे गट आणि ठाकरे गट यांच्यात मोठा वाद झाल्याची घटना समोर आली आहे. दोन्ही गटांचे कार्यकर्ते एकमेकांसमोर उभे ठाकत जोरदार घोषणाबाजी करत असल्याने परिसरात तणाव निर्माण झाला आहे.
काय घडले?
उपमुख्यमंत्री एकनाथ शिंदे यांचा बालेकिल्ला असलेल्या ठाण्यात आज शिवसेना ठाकरे गटाचा मेळावा आयोजित करण्यात आला होता. या मेळाव्यासाठी शिवसेना ठाकरे गटाचे नेते ठाण्यात पोहोचले. मात्र, आनंद आश्रम परिसरात पोहोचताच शिंदे गटाच्या कार्यकर्त्यांनी जोरदार विरोध दर्शवला आणि घोषणाबाजी सुरू केली.
संजय राऊत आणि केदार दिघे यांची प्रतिक्रिया
या घटनेवर प्रतिक्रिया देताना शिवसेना ठाकरे गटाचे नेते संजय राऊत यांनी एकनाथ शिंदे यांच्यावर जोरदार टीका केली. “आनंद आश्रम कोण्या खासगी व्यक्तीच्या नावावर करण्यात आले आहे. तो आता दिघे साहेबांचा आश्रम राहिला नाही,” असे राऊत म्हणाले.
तर शिवसेना ठाकरे गटाचे नेते केदार दिघे यांनी शिंदे गटावर निशाणा साधत म्हटले की, “ज्यांना आपण दैवत मानतो, तिथे कोणीही नतमस्तक होण्यासाठी आलं तर त्यांचं स्वागत करायला हवं. पण यांच्याकडे दुसरे मुद्देच नाहीत, त्यामुळे ते असं करत आहेत.”
राजकीय तणाव वाढण्याची शक्यता
या वादामुळे ठाण्यातील राजकीय वातावरण तापले असून, पुढील काही दिवसांत दोन्ही गटांमध्ये संघर्ष वाढण्याची शक्यता व्यक्त केली जात आहे.