नाशिक आणि रायगड जिल्ह्यांच्या पालकमंत्री पदावरून सुरू असलेला तिढा लवकरच सुटण्याची चिन्हं आहेत. मुख्यमंत्री देवेंद्र फडणवीस यांच्या नेतृत्वाखाली सुरू असलेल्या राजकीय हालचालींमुळे हा प्रश्न लवकरच मार्गी लागण्याची शक्यता आहे.
नाशिकसाठी भाजपचा मजबूत दावा
नाशिकमध्ये सिंहस्थ कुंभमेळा होणार असल्याने भाजप हे महत्त्वाचे पालकमंत्री पद सहजासहजी सोडण्याची शक्यता नाही. गिरीश महाजन यांच्या नावाची चर्चा जोर धरत असून, शहरात त्यांच्या समर्थनार्थ बॅनरबाजीही सुरू झाली आहे. “हिंदू जनसेवक गिरीश भाऊ नाशिकचे पालकमंत्री” अशा आशयाचे पोस्टर कार्यकर्त्यांनी लावले आहेत.
रायगडमध्ये कोण मारणार बाजी?
रायगडच्या पालकमंत्री पदासाठी शिवसेनेचे भरत गोगावले आणि राष्ट्रवादी काँग्रेसच्या (अजित पवार गट) आदिती तटकरे यांच्यात रस्सीखेच सुरू आहे. मुख्यमंत्री फडणवीस यांनी रायगड दौऱ्यात उपमुख्यमंत्री एकनाथ शिंदे, भरत गोगावले आणि आदिती तटकरे यांना आपल्या वाहनात सोबत घेतल्याने चर्चा अधिक रंगली आहे. या भेटीनंतर रायगडमधील तिढा सुटण्याची शक्यता वर्तवली जात आहे.
शिंदे-फडणवीस यांची शिष्टाई निर्णायक?
मुख्यमंत्री फडणवीस आणि उपमुख्यमंत्री शिंदे यांच्यातील चर्चेच्या आधारावरच अंतिम निर्णय होईल. अजित पवार किंवा एकनाथ शिंदे यापैकी कोण एक पाऊल मागे घेतो, यावर तोडगा अवलंबून आहे.
पालकमंत्री निवडीसह मोठ्या राजकीय हालचाली?
नाशिक आणि रायगडच्या पालकमंत्री नियुक्तीबरोबरच इतर जिल्ह्यांमध्येही काही महत्त्वाचे निर्णय होण्याची शक्यता आहे. पुढील काही दिवसांत सरकारकडून अधिकृत घोषणा अपेक्षित आहे.