इतिहास अभ्यासक इंद्रजीत सावंत यांना पुन्हा एकदा जीवे मारण्याची धमकी मिळाली आहे. काही दिवसांपूर्वीच ऑडिओ क्लिपच्या प्रकरणामुळे चर्चेत असलेल्या सावंत यांना सोशल मीडियावरून धमकी देण्यात आली. एका अकाउंटवरून त्यांना “तुम्ही थोड्याच दिवसांचे सोबती, तुम्हाला घरी येऊन संपवू”, असा इशारा दिला गेला.
“धमक्यांची पर्वा नाही, पण ऐतिहासिक सत्य मांडत राहीन”
या घटनांबाबत प्रतिक्रिया देताना इंद्रजीत सावंत यांनी स्पष्ट केले की, अशा धमक्या वारंवार येत असल्या तरी त्यांना भीती वाटत नाही. “मी कोणत्याही धमकीला घाबरत नाही आणि यासंदर्भात कोणतीही तक्रार दाखल करणार नाही. मात्र, छत्रपती शिवाजी महाराज यांचा अपमान होत असेल, तर त्यावर आवाज उठवणे आवश्यक आहे.” असे ते म्हणाले.
यापूर्वीही धमक्या; ऑडिओ क्लिपचा वाद अजूनही ताजा
केवळ चार दिवसांपूर्वी प्रशांत कोरटकर नावाच्या व्यक्तीकडूनही सावंत यांना जीवे मारण्याची धमकी दिल्याचा आरोप त्यांनी केला होता. यासंदर्भात सावंत यांनी सोशल मीडियावर एक संभाषण शेअर केले होते. मात्र, कोरटकर यांनी हे आरोप फेटाळले होते.
या सततच्या धमक्यांमुळे सावंत यांच्या सुरक्षेचा प्रश्न उपस्थित होत असून, प्रशासनाकडून यावर काही कारवाई केली जाते का, हे पाहणे महत्त्वाचे ठरणार आहे.