मस्साजोग गावातील संतोष देशमुख यांच्या हत्येच्या तपासात काही आरोपींना अटक करण्यात आली असली तरी, या प्रकरणातील मुख्य आरोपी कृष्णा आंधळे अद्याप फरार आहे. या पार्श्वभूमीवर गावकऱ्यांनी आंदोलन केले, ज्यामुळे राज्य सरकारला विशेष सरकारी वकील म्हणून उज्ज्वल निकम यांची नियुक्ती करावी लागली. मात्र, अजूनही काही मागण्या प्रलंबित आहेत.
दरम्यान, कृष्णा आंधळेला पकडून देण्याच्या नावाखाली आमदार सुरेश धस आणि खासदार बजरंग सोनवणे यांची फसवणूक झाल्याचा प्रकार समोर आला आहे.
फसवणुकीचा प्रकार कसा घडला?
९ डिसेंबर २०२४ रोजी संतोष देशमुख यांची हत्या झाल्यानंतर बहुतांश आरोपींना पुण्यातून अटक करण्यात आली, मात्र कृष्णा आंधळे अजूनही पोलिसांच्या हातात सापडलेला नाही. अशातच, एका व्यक्तीने आमदार सुरेश धस यांना फोन करून कृष्णा आंधळे छत्रपती संभाजीनगरमध्ये लपल्याचे सांगितले आणि त्याला पकडून देण्यासाठी पाच हजार रुपये मागितले.
धस यांनी त्यावर विश्वास ठेवून संबंधित व्यक्तीला पैसे पाठवले आणि नगरमध्ये चार तास त्याची वाट पाहिली. मात्र, तो व्यक्ती तिथे पोहोचला नाही, त्यामुळे फसवणुकीचा प्रकार उघडकीस आला.
खासदार बजरंग सोनवणेंनाही गंडा
फक्त सुरेश धसच नाही, तर राष्ट्रवादीचे खासदार बजरंग सोनवणे यांनाही त्याच व्यक्तीने कृष्णा आंधळेच्या लोकेशनविषयी माहिती देण्याच्या बहाण्याने फसवले. त्यांनीही पोलिसांना याची माहिती दिली आहे.
हा प्रकार समोर आल्यानंतर पोलिसांनी अधिक तपास सुरू केला आहे. फरार आरोपी कृष्णा आंधळेचा शोध घेण्याबरोबरच, या फसवणुकीत कोण सहभागी होते, याचाही तपास केला जात आहे.