राष्ट्रवादी काँग्रेसमध्ये विभाजन झाल्यानंतर पहिल्यांदाच या पक्षाचे प्रमुख नेते एका मंचावर एकत्र येणार आहेत. शरद पवार यांच्या स्वीय सहाय्यक तुकाराम धुवाळी यांच्या श्रद्धांजली सभेच्या निमित्ताने हा ऐतिहासिक क्षण घडणार आहे.
श्रद्धांजली सभेचा आयोजन
तुकाराम धुवाळी हे शरद पवार यांचे दीर्घकाळ सहकारी होते. त्यांच्या निधनानंतर त्यांच्या सन्मानार्थ 27 फेब्रुवारी रोजी सायंकाळी 4.30 ते 6.30 या वेळेत वाय. बी. सेंटर येथे शोकसभा आयोजित करण्यात आली आहे.
शरद पवार आणि अजित पवार एकत्र
या सभेसाठी राष्ट्रवादी काँग्रेसचे ज्येष्ठ नेते शरद पवार आणि उपमुख्यमंत्री अजित पवार उपस्थित राहणार आहेत. त्यांच्यासह पक्षाचे अन्य महत्त्वाचे नेते – प्रफुल्ल पटेल, छगन भुजबळ, दिलीप वळसे पाटील, सुप्रिया सुळे, जयंत पाटील आणि सुनील तटकरेदेखील यात सहभागी होणार आहेत.
राजकीय दुरावा कमी होणार?
राष्ट्रवादी काँग्रेसच्या विभाजनानंतर दोन्ही गट वेगवेगळ्या वाटांवर गेले असले तरी, या सभेत दोन्ही गटाचे नेते एकत्र येणार असल्याने राजकीय समीक्षकांचे लक्ष या कार्यक्रमाकडे लागले आहे. काही महिन्यांपूर्वी शरद पवार आणि अजित पवार यांच्यात गुप्त बैठक झाल्याच्या चर्चा रंगल्या होत्या. त्यामुळे या श्रद्धांजली सभेमुळे पक्षातील दुरावा कमी होईल का, याकडे राजकीय वर्तुळाचे लक्ष आहे.
तुकाराम धुवाळी – एक विश्वासू सहकारी
धुवाळी यांनी 1977 पासून शरद पवार यांच्यासोबत कार्य केले. त्यांच्या प्रत्येक राजकीय प्रवासात ते पवार यांच्या सावलीसारखे राहिले. अत्यंत प्रामाणिक, निःस्वार्थी आणि विश्वासू सहकारी अशी त्यांची ओळख होती.
ही शोकसभा केवळ एका सहकाऱ्याला श्रद्धांजली वाहण्याचा कार्यक्रम नसून, राष्ट्रवादी काँग्रेसच्या भविष्यासाठी महत्त्वाचा टप्पा ठरू शकतो, असे राजकीय विश्लेषकांचे मत आहे.