पुण्यातील स्वारगेट बसस्थानकात घडलेल्या धक्कादायक घटनेनंतर संपूर्ण राज्यभरातून संताप व्यक्त केला जात आहे. या प्रकरणाच्या तपासासाठी पोलिसांनी 8 विशेष पथकं तैनात केली असून, आरोपीचा शोध वेगाने सुरू असल्याची माहिती गृहराज्यमंत्री योगेश कदम यांनी दिली.
गुप्ततेचा भाग आणि पोलिसांची तयारी
गृहराज्यमंत्र्यांनी स्पष्ट केले की, ही घटना लपवण्याचा प्रयत्न झालेला नाही, परंतु तपासाच्या दृष्टीने आवश्यक गुप्तता राखली गेली. पोलिसांच्या दुर्लक्षामुळे हा प्रकार घडला, असा गैरसमज असू नये. घटनेच्या रात्री पोलिसांची गस्त सुरू होती, आणि सीसीटीव्ही फुटेजमध्येही रात्री 1:30 वाजता वरिष्ठ पोलीस अधिकारी गस्त घालत असल्याचे दिसते.
आरोपी लवकरच होणार गजाआड
या घटनेतील आरोपीवर पूर्वी चोरीसारखे गुन्हे दाखल आहेत, आणि त्याला लवकरच अटक करण्यात येईल, असा विश्वास गृहराज्यमंत्र्यांनी व्यक्त केला. पोलिसांचा शोधमोहीम जोरात सुरू आहे, आणि आरोपीच्या हालचालींवर बारकाईने लक्ष ठेवले जात आहे.
परिवहन मंत्र्यांचा हस्तक्षेप आणि सुरक्षा उपाययोजना
परिवहन मंत्री प्रताप सरनाईक यांनी या प्रकरणाचा आढावा घेतला असून, भविष्यात अशा घटनांना आळा घालण्यासाठी कठोर पावलं उचलली जातील. त्यासाठी एसटी महामंडळाच्या सुरक्षेत सुधारणा केली जाणार असून, खासगी सुरक्षा कंपन्यांची मदत घेतली जाईल.
या प्रकरणाचा तपास वेगाने सुरू असून, लवकरच आरोपीला अटक होईल. राज्य सरकारकडून महिलांच्या सुरक्षेसाठी अधिक प्रभावी उपाययोजना करण्याचा संकल्प व्यक्त करण्यात आला आहे.