नॅशनल हेराल्ड घोटाळा प्रकरणात काँग्रेस पक्षाला मोठा झटका बसला आहे. अंमलबजावणी संचालनालयाने (ED) काँग्रेसच्या माजी अध्यक्षा सोनिया गांधी आणि खासदार राहुल गांधी यांच्याविरोधात औपचारिक आरोपपत्र दाखल केले आहे. या आर्थिक गैरव्यवहाराशी संबंधित प्रकरणात ही कारवाई करण्यात आली आहे.
25 एप्रिल रोजी पुढील सुनावणी
या आरोपपत्रात काँग्रेसचे वरिष्ठ सहकारी सॅम पित्रोदा, सुमन दुबे आणि इतर काही व्यक्तींची नावे देखील आहेत. यामध्ये ‘असोशिएटेड जर्नल्स लिमिटेड’ आणि ‘यंग इंडियन प्रायव्हेट लिमिटेड’ या दोन संस्थांमधील आर्थिक व्यवहारांबाबत गंभीर आरोप करण्यात आले आहेत. या खटल्याची पुढील सुनावणी 25 एप्रिल रोजी होणार आहे. सूत्रांनुसार काँग्रेस पक्ष कायदेशीर सल्ला घेत असून, न्यायालयात आपली बाजू मांडण्यासाठी तयारी करत आहे.
750 कोटींपेक्षा अधिक संपत्ती जप्त
या प्रकरणात ईडीने आतापर्यंत सुमारे 751.9 कोटी रुपयांची मालमत्ता जप्त केली आहे. यामध्ये 661.69 कोटींची संपत्ती ‘असोशिएटेड जर्नल्स लिमिटेड’ची असून उर्वरित 90.21 कोटी रुपये ‘यंग इंडियन’ या कंपनीशी संबंधित आहेत. ही संपत्ती अपारदर्शक पद्धतीने जमा करण्यात आल्याचा आरोप ईडीने केला आहे. दिल्ली, मुंबई आणि लखनौ येथे ही जप्तीची कारवाई करण्यात आली.