शिवसेना (उद्धव बाळासाहेब ठाकरे) गटाचे खासदार संजय राऊत यांनी पुन्हा एकदा केंद्र सरकारवर आणि राज्यातील सत्ताधाऱ्यांवर जोरदार टीका केली आहे. यावेळी त्यांनी खासदार सुनील तटकरे यांच्या राजकीय निष्ठेबाबत प्रश्नचिन्ह निर्माण करत, “तटकरे यांचे खरे नेते अजित पवार नव्हे, तर अमित शाह आहेत,” असा आरोप केला.
राऊत म्हणाले, “फक्त तटकरेच नव्हे, तर मुख्यमंत्री एकनाथ शिंदे यांचेही खरे नेतृत्व अमित शाह करतात. शाह यांच्या पाठबळाशिवाय पक्ष फोडता आला नसता. राज्यात कायदा-सुव्यवस्थेचा बोजवारा उडालाय, आणि गृहमंत्री फडणवीस यांना स्वतःचं पदही लक्षात नाही,” अशा शब्दांत त्यांनी तिखट शब्दांत टीका केली.
रायगड दौऱ्यावर येणाऱ्या अमित शाह यांच्या तटकरे यांच्या निवासस्थानी होणाऱ्या भोजनाच्या निमित्ताने हे विधान करण्यात आलं. राऊत यांच्या मते, हे राजकीय नातेसंबंध स्पष्ट दाखवतात की तटकरे यांचे राजकीय आदेश दिल्लीतून मिळतात.
तहव्वूर राणा प्रकरणाबाबत राऊत आक्रमक
तहव्वूर राणा प्रकरणात राऊत यांनी भाजपवर निवडणूक डावपेच खेळण्याचा आरोप करत म्हटलं, “२००९ पासून सुरू असलेल्या कायदेशीर प्रक्रियेचं श्रेय आता भाजप घेत आहे. राणाला भारतात आणून निवडणूक प्रचारात वापरण्याची शक्यता आहे. बिहारमध्ये त्याला फाशीचं भांडवल केलं जाईल,” अशी टीका त्यांनी केली.
तसेच नीरव मोदी आणि मेहुल चौकसी यांच्यासारख्या आर्थिक गुन्हेगारांना भारतात परत आणण्याची मागणी त्यांनी केली. “फक्त राणाला परत आणून विजयाचा डंका वाजवू नये,” असा टोला त्यांनी केंद्र सरकारला लगावला.