बीड जिल्ह्यातील मस्साजोगचे सरपंच संतोष देशमुख यांच्या हत्येच्या ७८ दिवसांनंतर मोठा निर्णय घेण्यात आला आहे. या गाजलेल्या प्रकरणात अखेर ज्येष्ठ वकील उज्ज्वल निकम यांची विशेष सरकारी वकील म्हणून नियुक्ती करण्यात आली आहे. तसेच बाळासाहेब कोल्हे यांना सहाय्यक विशेष सरकारी वकील म्हणून जबाबदारी देण्यात आली आहे.
गावकऱ्यांचे आंदोलन आणि मागण्या
संतोष देशमुख हत्या प्रकरणातील मुख्य आरोपी कृष्णा आंधळे अद्याप फरार आहे. त्यामुळे गावकऱ्यांमध्ये संतापाची लाट उसळली असून ग्रामस्थ, वैभवी देशमुख आणि धनंजय देशमुख यांनी अन्नत्याग आंदोलन सुरू केले आहे. त्यांच्या मुख्य मागण्यांमध्ये –
✔ फरार आरोपींच्या तात्काळ अटकेची मागणी
✔ प्रकरण फास्ट ट्रॅक कोर्टात चालवण्याची मागणी
✔ उज्ज्वल निकम यांची सरकारी वकील म्हणून नियुक्ती
गेल्या दोन महिन्यांपासून हा मुद्दा गाजत असताना अखेर सरकारने मोठा निर्णय घेतला आहे. उज्ज्वल निकम यांच्यासारख्या अनुभवी वकिलांची नियुक्ती झाल्याने गावकऱ्यांनी समाधान व्यक्त केले असून, आता न्याय मिळेल अशी आशा व्यक्त केली आहे.