संतोष देशमुख यांच्या हत्येनंतर या प्रकरणावर तीव्र राजकीय प्रतिक्रिया उमटत आहेत. भाजप आमदार सुरेश धस यांनी या घटनेबाबत आक्रमक भूमिका घेतली असून, दोषींवर कठोर कारवाई करण्याची मागणी केली आहे.
धस यांनी या घटनेला “अत्यंत भयावह” संबोधत, महाराष्ट्रातील जनतेच्या संवेदनांना हादरा बसला असल्याचे सांगितले. तसेच, हत्येचे व्हायरल झालेले फोटो पाहून प्रत्येक संवेदनशील व्यक्तीच्या मनात अस्वस्थता निर्माण झाली असल्याचे त्यांनी नमूद केले.
मुख्यमंत्र्यांकडून कठोर कारवाईची अपेक्षा
या प्रकरणात मुख्यमंत्री आणि प्रशासनाने तत्काळ कारवाई करावी, असे धस यांनी स्पष्ट केले. त्यांनी मुख्यमंत्र्यांचे आभार मानत, त्यांचा सकारात्मक प्रतिसाद आशादायक असल्याचे सांगितले. तसेच, या प्रकरणाचा सखोल तपास व्हावा यासाठी विशेष तपास पथक (एसआयटी) अधिक सक्रिय होण्याची गरज असल्याचेही ते म्हणाले.
दोषींना कठोर शिक्षा व्हावी
धस यांनी हत्येतील गुन्हेगारांना शक्य तितक्या कमी कालावधीत कठोर शिक्षा व्हावी, अशी मागणी केली. “दोषींना त्वरित शिक्षा देण्यात यावी आणि हे प्रकरण वर्षभरापेक्षा अधिक लांबवू नये,” असे त्यांनी स्पष्ट केले.
खंडणीच्या मुद्द्यावर प्रश्नचिन्ह
या घटनेमागे खंडणीचा विषय असल्याचा संशय व्यक्त करत, सातपुडा बंगल्यावर या संदर्भात बैठक झाली होती का, याचा तपास होण्याची गरज असल्याचे धस यांनी म्हटले. तसेच, या प्रकरणात संलग्न असलेल्या सर्वांवर योग्य ती कारवाई होईल, असा विश्वासही त्यांनी व्यक्त केला.