संतोष देशमुख हत्या प्रकरणात CID ने 1800 पानांचे आरोपपत्र दाखल केले असून, या तपासातून मुख्य सुत्रधाराचे नाव उघड झाले आहे. CID च्या अहवालानुसार वाल्मिक कराड हा या हत्येचा मास्टरमाइंड असल्याचे स्पष्ट झाले आहे.
हत्या का करण्यात आली?
CID च्या तपासानुसार, खंडणी उकळण्याच्या व्यवहारात संतोष देशमुख अडथळा ठरत होते. त्यामुळे वाल्मिक कराडने त्यांची हत्या करण्याचे कारस्थान रचले. यापूर्वीही गावकऱ्यांनी आणि राजकीय नेत्यांनी याच दिशेने आरोप केले होते, जे CID च्या आरोपपत्रातून आता अधिकृतपणे सिद्ध झाले आहेत.
आरोपींवर कठोर कारवाई
या प्रकरणात आठ जणांवर मकोका अंतर्गत गुन्हा दाखल करण्यात आला आहे. CID च्या तपासात सुदर्शन घुले, वाल्मिक कराड आणि विष्णू चाटे यांच्या संभाषणांचे पुरावे सापडले असून, हत्येच्या आधी आणि दिवशी नेमकी काय चर्चा झाली याचा तपशीलही समोर आला आहे.
पुरावे आणि व्हिडिओ फुटेज
CID च्या हाती संतोष देशमुख यांना मारहाण करतानाचे व्हिडिओ फुटेज लागले आहे, ज्यामध्ये आरोपी स्पष्ट दिसत आहेत. तसेच, CID ने आरोपपत्रात उल्लेख केला आहे की, वाल्मिक कराडला एका खासगी कंपनीकडून 2 कोटी रुपयांची खंडणी वसूल करायची होती, आणि संतोष देशमुख हा त्यासाठी अडथळा बनला होता.
न्यायाच्या दिशेने पुढचे पाऊल
CID च्या या आरोपपत्रामुळे या प्रकरणात मोठी प्रगती झाली असून, आता न्यायप्रक्रियेचा वेग वाढण्याची शक्यता आहे. पुढील सुनावणीमध्ये या पुराव्यांवर आधारित कारवाई होण्याची अपेक्षा आहे.