शिवसेना (उद्धव बाळासाहेब ठाकरे गट) खासदार संजय राऊत यांनी महायुती सरकारवर जोरदार हल्लाबोल केला आहे. “धनंजय मुंडे, कृष्णा आंधळे, वाल्मिक कराड हे सामाजिक कार्यकर्ते आहेत,” अशा शब्दांत त्यांनी मुख्यमंत्री देवेंद्र फडणवीस यांच्यावर निशाणा साधला.
फडणवीस सरकारवर आरोप
संजय राऊत यांनी म्हटले की, “मुख्यमंत्र्यांना गृहखाते आणि पोलीस खाते सांभाळण्यासाठी राजकारणातून वेळ मिळत नाही. त्यामुळे त्यांचे हे सामाजिक कार्यकर्ते विनयभंग करतात,” अशी जहरी टीका त्यांनी केली.
“जिकडे सत्ताधारी, तिकडे व्यभिचारी!”
राऊत यांनी सरळसरळ सरकारवर आरोप करत म्हटले की, “सत्ताधाऱ्यांचे लोक गुन्ह्यांमध्ये अडकले आहेत. जिकडे सत्ताधारी, तिकडे व्यभिचारी,” अशी घणाघाती टीका त्यांनी केली.
विरोधी पक्षनेतेपदाचा मुद्दा
संजय राऊत यांनी विधानसभेत विरोधी पक्षनेतेपद शिवसेना (उबाठा) गटाला मिळायला हवे, अशी मागणी केली. “जर विधानसभेत विरोधी पक्षनेता नसेल, तर भ्रष्टाचार वाढेल,” असे ते म्हणाले.
त्यांनी उदाहरण देत सांगितले की, “इतर राज्यांत जरी केवळ पाच आमदार असले, तरी विरोधी पक्षनेतेपद दिले जाते. महाराष्ट्रात विरोधी पक्षांकडे मिळून 50 आमदार आहेत, त्यामुळे सरकारने हे पद द्यायला हवे.”
पुढील राजकीय हालचालींवर लक्ष
संजय राऊत यांच्या या टीकेनंतर महायुती सरकारची पुढील भूमिका काय असेल आणि विरोधक काय पावले उचलतील, याकडे सगळ्यांचे लक्ष लागले आहे.