कोकणानंतर आता पश्चिम महाराष्ट्रातही एकनाथ शिंदे यांच्या नेतृत्वाखालील शिवसेनेच्या ‘ऑपरेशन टायगर’ मोहिमेने जोर धरला आहे. कोल्हापूर जिल्ह्यातील हातकणंगले येथील माजी आमदार डॉ. सुजित मिणचेकर लवकरच शिंदे गटात प्रवेश करणार असल्याची माहिती समोर आली आहे.
महत्वाचे राजकीय हालचाली
मिळालेल्या माहितीनुसार, आगामी दोन दिवसांत मुंबईत मुख्यमंत्री एकनाथ शिंदे यांच्या उपस्थितीत सुजित मिणचेकर अधिकृतरित्या शिवसेनेत दाखल होतील. याआधी, शिवसेना फुटीनंतर ते उद्धव ठाकरे गटासोबत राहिले होते. मात्र, मागील विधानसभा निवडणुकीत संधी न मिळाल्याने त्यांनी स्वाभिमानी शेतकरी संघटनेकडून निवडणूक लढवली होती.
मिणचेकर यांचा राजकीय प्रवास
डॉ. सुजित मिणचेकर हे हातकणंगलेचे माजी आमदार आणि गोकुळ दूध संघाचे संचालक आहेत. त्यांची ओळख एकनाथ शिंदे यांचे निकटवर्तीय म्हणून आहे. तीन वर्षांपूर्वी शिवसेना फूटीनंतर शिंदे गटातील ४० आमदार गुवाहाटीला रवाना झाले होते. त्यावेळी, मिणचेकर यांच्याही गटबांधणीबाबत तर्कवितर्क लढवले जात होते, मात्र त्यांनी उद्धव ठाकरे गटात राहण्याचा निर्णय घेतला.
उमेदवारी न मिळाल्याने नाराजी
मागील विधानसभा निवडणुकीत उद्धव ठाकरे गटाने त्यांना उमेदवारीचे आश्वासन दिले होते. मात्र, ऐनवेळी निर्णय बदलल्याने मिणचेकर यांनी स्वाभिमानी शेतकरी संघटनेकडून निवडणूक लढवली. आता, पुन्हा एकदा राजकीय समीकरणे बदलत असल्याचे दिसून येत आहे.
या घडामोडींमुळे पश्चिम महाराष्ट्रातील राजकारणाला वेग आला असून, शिवसेनेच्या ‘ऑपरेशन टायगर’ मोहिमेअंतर्गत आणखी काही नेते पक्षांतर करणार का, याकडे सर्वांचे लक्ष लागले आहे.