महाराष्ट्राच्या राजकारणात आज मोठ्या घडामोडींचा दिवस ठरतो आहे. मुख्यमंत्री एकनाथ शिंदे आणि शिवसेना (उद्धव बाळासाहेब ठाकरे) गटाचे प्रमुख उद्धव ठाकरे हे दोघंही आज दिल्लीच्या दौऱ्यावर आहेत. या दोन्ही नेत्यांचे दौरे एकाच दिवशी ठरत असल्याने राजकीय वर्तुळात उलथापालथीच्या चर्चांना उधाण आलं आहे.
मुख्यमंत्री एकनाथ शिंदे काल रात्री उशिरा दिल्लीला दाखल झाले असून, आज ते पंतप्रधान नरेंद्र मोदी आणि केंद्रीय गृहमंत्री अमित शाह यांची भेट घेणार आहेत. ही बैठक दुपारी 1 वाजता अमित शाह आणि त्यानंतर पंतप्रधान मोदी यांच्यासोबत होणार आहे. या भेटीत आगामी स्थानिक स्वराज्य संस्था आणि महापालिका निवडणुकांबाबत तसेच राज्य सरकारच्या चालू मुद्द्यांवर चर्चा होणार असल्याची शक्यता आहे. शिवाय, सुप्रीम कोर्टात प्रलंबित असलेल्या पक्षचिन्हाच्या सुनावणीबाबतही संवाद होऊ शकतो.
एकनाथ शिंदे यांचा आठवडाभरातील हा दुसरा दिल्ली दौरा आहे. काही दिवसांपूर्वी त्यांनी रात्रीच्या सुमारास भाजपच्या वरिष्ठ नेत्यांशी गुप्त बैठक घेतल्याची माहिती चर्चेत आली होती. त्यामुळे शिंदे गट आणि भाजप यांच्यातील संबंध अधिक घट्ट करण्याचा प्रयत्न सुरु असल्याचे संकेत मिळत आहेत.
दुसऱ्या बाजूला, उद्धव ठाकरे हे दुपारी 3 वाजता दिल्लीला पोहोचणार आहेत. त्यांचा तीन दिवसांचा दौरा असून, इंडिया आघाडीच्या संयुक्त बैठकीसाठी ते उपस्थित राहणार आहेत. काँग्रेस नेते राहुल गांधी यांच्या निवासस्थानी होणाऱ्या स्नेहभोजनालाही ते सहभागी होतील. याशिवाय, ठाकरे गटाचे खासदार आणि नेते यांच्यासोबत स्वतंत्र बैठक घेऊन संसद अधिवेशन, राज्यातील स्थिती आणि निवडणूक रणनीतीबाबत चर्चा केली जाणार आहे.
दोन्ही गटांचा दिल्ली दौरा एकाच वेळी होणं ही केवळ योगायोग नाही, तर यामागे मोठे राजकीय गणित असल्याची शक्यता वर्तवली जात आहे. शिंदे गट सत्ता टिकवण्यासाठी प्रयत्नशील असताना, ठाकरे गट विरोधी INDIA आघाडीत आपली भूमिका भक्कम करण्याच्या तयारीत असल्याचं चित्र आहे.