शिवसेना (शिंदे गट) नेते आणि खासदार नरेश म्हस्के यांनी शिवसेना (उद्धव ठाकरे गट) खासदार संजय राऊत यांच्यावर जोरदार टीका केली आहे. त्यांनी आरोप केला की, संजय राऊत यांच्या एका लेखामुळे दिवंगत शिवसेना नेते आनंद दिघे यांना टाडा कायद्याखाली अटक झाली होती. त्यामुळे आता राऊत यांनी दिघे साहेबांच्या पुतळ्याला हार घालण्याची भाषा करू नये, असे म्हस्के यांनी स्पष्ट केले.
राऊतांच्या टीकेला प्रतिउत्तर
म्हस्के यांनी ठाणे महानगरपालिकेतील एका मेळाव्यात बोलताना संजय राऊत यांच्यावर जोरदार हल्ला केला. त्यांनी सांगितले की, “काशिनाथ घाणेकर नाट्यगृहाला आनंद दिघे यांचे नाव देण्याला विरोध करणाऱ्या लोकांनी आता त्यांच्या पुतळ्याला पुष्पहार अर्पण करण्याची भाषा करू नये.”
“स्वप्नातही एकनाथ शिंदे दिसतात” – म्हस्के यांची टीका
संजय राऊत हे सातत्याने मुख्यमंत्री एकनाथ शिंदे यांच्यावर टीका करत असतात. यावर प्रत्युत्तर देताना म्हस्के म्हणाले, “राऊत रात्री भांडुपच्या हातभट्टीवर जातात, त्यामुळे त्यांना स्वप्नातही एकनाथ शिंदे दिसतात. सकाळी उतरली नसेल, म्हणून ते असे बोलतात.”
“उद्धव ठाकरेंची सेना सोनिया गांधींकडे गहाण ठेवली”
म्हस्के यांनी उद्धव ठाकरे यांनाही लक्ष्य करत म्हटले की, “शिल्लक राहिलेली सेना त्यांनी सोनिया गांधींकडे गहाण ठेवली आहे. बाळासाहेब ठाकरे यांचा हिंदुत्ववादी पक्ष उद्धव ठाकरेंनी काँग्रेसच्या हातात सोपवला होता, त्याला एकनाथ शिंदे यांनी मुक्त केले.”
“राहुल गांधींचे कपडे धुण्याचे काम का?”
म्हस्के यांनी शिवसेना (ठाकरे गट) व काँग्रेस यांच्यातील जवळीकाही टीका केली. “सावरकरांच्या नावाने शपथ घेणाऱ्यांनी विचार करावा, ज्यांनी सावरकरांचा अपमान केला, त्याच राहुल गांधींचे समर्थन का करताय?” असा सवाल त्यांनी केला.
“ठाणेकरांनी दाखवून दिले की, खरा वारसदार कोण”
लोकसभा आणि विधानसभा निवडणुकांमध्ये ठाणेकरांनी आपली भूमिका स्पष्ट केली आहे, असेही म्हस्के म्हणाले. “दिघे साहेबांचा खरा वारसदार कोण, हे ठाणेकरांनी आधी विधानसभेत आणि आता लोकसभेतही दाखवून दिले आहे. जनता एकनाथ शिंदे यांच्या पाठीशी आहे,” असे त्यांनी ठामपणे सांगितले.
राजकीय संघर्ष तीव्र होणार?
शिंदे गट आणि ठाकरे गटामधील संघर्ष दिवसेंदिवस तीव्र होताना दिसत आहे. नरेश म्हस्के यांच्या या वक्तव्यामुळे राज्याच्या राजकारणात नव्या चर्चांना उधाण येण्याची शक्यता आहे.