राष्ट्रवादी काँग्रेसच्या शरद पवार गटाला मोठा धक्का देणारी घटना घडली आहे. धाराशिव जिल्ह्यातील परांडा मतदारसंघाचे माजी आमदार राहुल मोते यांनी आता अजित पवार यांच्या नेतृत्वाखालील अधिकृत राष्ट्रवादी काँग्रेस पक्षात प्रवेश केला आहे. ५ ऑगस्ट २०२५ रोजी मुंबईत अजित पवार यांच्या उपस्थितीत त्यांनी अधिकृत पक्षप्रवेश केला.
राहुल मोते हे तीन वेळा आमदार राहिले आहेत आणि मराठवाड्यातील राष्ट्रवादीचे मजबूत नेते मानले जात होते. शरद पवारांच्या नेतृत्वावर त्यांचा दीर्घकाळ विश्वास होता. मात्र अलीकडील काळात शरद पवार गटाची लोकसभा आणि विधानसभा निवडणुकांतील कामगिरी कमकुवत झाल्याने, बरेच नेते हळूहळू अजित पवार गटात प्रवेश करत आहेत. याच पार्श्वभूमीवर मोते यांनीही आपली दिशा बदलली आहे.
पक्षप्रवेशानंतर राहुल मोते यांनी अजित पवार यांच्याकडे एक महत्त्वाची मागणी केली. त्यांनी सांगितले की, “कृष्णा मराठवाडा लिफ्ट सिंचन योजनेतून उजनी धरणामार्गे सिना कोळेगाव धरणात पुरेसा पाण्याचा प्रवाह आणण्यासाठी प्रयत्न करा,” अशी विनंती केली. त्यामुळे त्यांच्या प्रवेशासोबत स्थानिक विकासविषयक मुद्द्यांनाही चालना मिळाली आहे.
या प्रवेशामुळे अजित पवार यांचा मराठवाड्यातील पक्ष संघटनात्मक बळ वाढणार आहे. परांडा, भूम आणि सोलापूर परिसरात अजित गटाची पकड मजबूत होईल, असे राजकीय विश्लेषकांचे मत आहे. यासोबतच अजून काही माजी आमदार आणि स्थानिक नेते अजित गटात जाण्याची शक्यता व्यक्त केली जात आहे.
दुसरीकडे, शरद पवार गटात या प्रकारावर अजून कोणतीही अधिकृत प्रतिक्रिया आलेली नाही. मात्र मागील काही महिन्यांत गटातल्या नाराज नेत्यांनी मोठ्या प्रमाणात अजित गटात प्रवेश केल्याचे चित्र आहे. त्यामुळे आगामी स्थानिक स्वराज्य संस्थांच्या निवडणुकांमध्ये अजित पवार गट अधिक मजबूत होण्याची शक्यता वर्तवली जात आहे.