पुण्यातील वैष्णवी हगवणे याच्या संशयास्पद मृत्यूने राज्यात खळबळ उडवली आहे. हा प्रकरण राष्ट्रवादी काँग्रेस पक्षाच्या एका नेत्याच्या कुटुंबाशी संबंधित असल्यामुळे अधिकच गाजू लागले. वैष्णवी ही पक्षाचे नेते राजेंद्र हगवणे यांची सून असून तिच्या मृत्यूमुळे अनेक प्रश्न निर्माण झाले आहेत. या पार्श्वभूमीवर राष्ट्रवादी काँग्रेसचे अध्यक्ष व राज्याचे उपमुख्यमंत्री अजित पवार यांनी यावर आपली पहिली प्रतिक्रिया दिली आहे.
बारामती विमानतळावर पत्रकारांशी बोलताना अजित पवार म्हणाले, “या संपूर्ण प्रकरणाशी माझा काहीही संबंध नाही. मी केवळ लग्नासाठी हजर होतो, त्याव्यतिरिक्त माझा त्या कुटुंबाशी कोणताही जवळचा संबंध नाही.” त्यांनी पुढे स्पष्ट केले की, “नालायक माणसे माझ्या पक्षात नकोत. म्हणूनच राजेंद्र हगवणे आणि त्यांचा मुलगा सुशील हगवणे यांची पक्षातून हकालपट्टी करण्यात आली आहे.”
अजित पवार यांनी यावेळी पत्रकार परिषद घेऊन अधिक सविस्तर भूमिका मांडण्याचा इशारा दिला आहे. त्यांनी सांगितले की, “जे चुकीचे वागतात, त्यांच्यामुळे संपूर्ण पक्षाचे नाव बिघडू नये म्हणून कठोर भूमिका घेणे आवश्यक असते.” याचबरोबर त्यांनी पोलिसांनी फरार आरोपींचा शोध घेण्यासाठी अधिक पथके नियुक्त केल्याचेही सांगितले.
या प्रकरणात वैष्णवी आणि शशांक हगवणे यांचे लव्ह मॅरेज झाल्याचे समोर आले आहे. वैष्णवीच्या इच्छेने हे विवाह थाटामाटात पार पडले होते. मात्र, या लग्नासाठी हुंड्याच्या स्वरूपात फॉर्च्यूनर गाडी, सोनं, आणि महागडं घड्याळ मागितल्याचा आरोप तिच्या नातेवाइकांनी केला आहे. विशेष म्हणजे ही गाडी अजित पवार यांच्या हस्ते देण्यात आली होती, यामुळे वाद अधिक वाढला.
मनसे नेत्या शालिनी ठाकरे यांनी यावरून अजित पवार यांच्यावर टीका करत विचारले की, “फॉर्च्यूनर गाडी देताना तुम्ही उपमुख्यमंत्री आहात हे विसरलात का?” तसेच राष्ट्रवादीच्या नेत्या रुपाली ठोंबरे यांनी स्पष्टीकरण दिले की, अजित पवार यांना राजकीय शिष्टाचार म्हणून लग्नासाठी आमंत्रित केले गेले होते आणि त्यांच्या उपस्थितीचा मृत्यू प्रकरणाशी काहीही संबंध नाही.
अजित पवार यांनी या प्रकरणात पुणे पोलीस आयुक्तांशी चर्चा करून दोषींवर कठोर कारवाई करण्याचे निर्देश दिल्याचे ठोंबरे यांनी सांगितले. यामुळे या प्रकरणात कोणताही राजकीय हस्तक्षेप होणार नाही, असा विश्वास त्यांनी व्यक्त केला.