शिवसेनेचे नेते आणि मंत्री गुलाबराव पाटील यांनी शिक्षकांशी संवाद साधताना एक वेगळ्याच शैलीत दिलेला सल्ला सध्या चर्चेचा विषय ठरत आहे. जिल्हा परिषदेच्या शाळांमध्ये विद्यार्थ्यांची संख्या वाढावी, यासाठी त्यांनी विनोदी शैलीत एक उदाहरण दिलं – “जसा आम्ही पक्ष फोडतो, तसं तुम्ही विद्यार्थ्यांना फोडा.”
शाळांमध्ये वाढती रिक्तता आणि शिक्षकांची चिंता
जळगाव ग्रामीण भागातील जिल्हा परिषदेच्या शाळांमध्ये सध्या सुमारे ४५ हजार विद्यार्थी आहेत. मात्र गेल्या काही काळात या संख्येत वाढ झालेली नाही. ही बाब उपस्थित करताना गुलाबराव पाटील म्हणाले की, मराठी शाळांमध्ये विद्यार्थ्यांची संख्या वाढली असती, तर ५० हजार डीएड केलेल्या तरुणांना नोकऱ्या मिळाल्या असत्या.
शिक्षकांबद्दलचा आदरही व्यक्त
आपल्या भाषणात त्यांनी स्पष्ट केलं की, “मी आयुष्यात अनेकांना त्रास दिला असेल, पण तो तात्पुरताच होता. मात्र, मी कधीही शिक्षकांना त्रास दिला नाही. कारण शिक्षकांचं स्थान माझ्या मनात वेगळं आहे.”
विवादित विधानावर स्पष्टीकरण
आपल्या वक्तव्यावर गदारोळ होऊ नये म्हणून पाटील यांनी लगेच स्पष्टीकरणही दिलं. “मी विनोदाच्या स्वरात बोललो. जसं राजकारणात आम्ही एकमेकांचे कार्यकर्ते आपल्या पक्षात घेतो, तसंच शिक्षकांनी शाळांमध्ये नव्या विद्यार्थ्यांना आकर्षित करावं, हा यामागचा उद्देश होता. यात कोणताही चुकीचा हेतू नव्हता,” असंही त्यांनी स्पष्ट केलं.
‘मुख्यमंत्री माझी शाळा, सुंदर शाळा’ या उपक्रमाअंतर्गत आयोजित केलेल्या पुरस्कार वितरण सोहळ्यात पाटील बोलत होते. त्यांच्या विनोदी शैलीतील या विधानामुळे कार्यक्रमात रंगत तर आलीच, पण त्याचबरोबर चर्चाही रंगली.