संतोष देशमुख हत्या प्रकरणातील आरोपी वाल्मीक कराड याला तुरुंगात विशेष सुविधांचा लाभ मिळत असल्याचा आरोप कॉंग्रेस नेते विजय वडेट्टीवार यांनी केला आहे. त्यांनी राज्याचे अन्न व नागरी पुरवठा मंत्री धनंजय मुंडे यांच्यावर गंभीर आरोप करत म्हटले की, “मुंडे यांच्या आशीर्वादामुळेच कराडला व्हीआयपी ट्रीटमेंट मिळत आहे.”
विरोधकांचा सरकारवर हल्लाबोल
या प्रकरणावर बोलताना वडेट्टीवार म्हणाले, “वाल्मीक कराडला तुरुंगात कोणताही त्रास होऊ नये, यासाठी थेट मंत्र्यांकडून आदेश दिले जात असावेत. मुंडे यांच्या प्रभावाशिवाय अशा सुविधा मिळू शकत नाहीत.” त्यामुळेच विरोधकांकडून मुंडेंच्या राजीनाम्याची मागणी केली जात आहे.
राजकीय वर्तुळात खळबळ
या आरोपांमुळे राजकीय वातावरण तापले असून, राज्य सरकारवर टीकेचा भडिमार सुरू आहे. या प्रकरणात आरोपींना अभय दिले जात असल्याचा आरोप करत वडेट्टीवार यांनी सरकारच्या भूमिकेवर प्रश्नचिन्ह उपस्थित केले आहे. आता या प्रकरणावर मुंडे आणि सरकार काय प्रतिक्रिया देतात, याकडे सर्वांचे लक्ष लागले आहे.