राजकीय वर्तुळात मोठी खळबळ उडवणारी घटना समोर आली आहे. दोन दिवसांपूर्वी राष्ट्रवादी काँग्रेसच्या शरद पवार गटाचे नेते अभिजीत पवार यांनी अजित पवार गटात प्रवेश केला होता. मात्र, आता त्यांनी पुन्हा शरद पवार गटात परतण्याचा निर्णय घेतला आहे.
दबावाखाली घेतलेला निर्णय?
अभिजीत पवार यांनी सांगितले की, अजित पवार गटात प्रवेश करण्यासाठी त्यांच्यावर मोठा दबाव टाकण्यात आला होता. त्यांच्यासोबत हेमंत वाणी यांनी देखील हा पक्षांतराचा निर्णय घेतला होता. मात्र, दोनच दिवसांत त्यांनी पुन्हा आपल्या मूळ गटाकडे परतण्याचा निर्णय घेतला. अभिजीत पवार यांनी आरोप केला आहे की, नजीम मुल्ला यांनी त्यांना पक्षप्रवेशासाठी ब्लॅकमेल केले. “माझी चूक झाली की मी शरद पवार साहेबांशी आधी बोलायला हवं होतं, पण तणावाच्या परिस्थितीत हा निर्णय घेतला गेला,” असे त्यांनी स्पष्ट केले.
जितेंद्र आव्हाडांचे निकटवर्तीय
अभिजीत पवार हे राष्ट्रवादी काँग्रेसचे नेते जितेंद्र आव्हाड यांचे निकटवर्तीय मानले जातात. त्यामुळे त्यांच्या या घरवापसीमुळे शरद पवार गटाला मोठा आधार मिळाला आहे. राष्ट्रवादी काँग्रेसमध्ये सुरू असलेल्या अंतर्गत संघर्षाच्या पार्श्वभूमीवर ही घटना महत्त्वाची मानली जात आहे.
राजकीय घडामोडींच्या या नाट्यमय वळणामुळे आगामी काळात राष्ट्रवादी काँग्रेसच्या दोन्ही गटांमध्ये काय घडामोडी होणार, याकडे सर्वांचे लक्ष लागले आहे.