केंद्रीय गृहमंत्री अमित शाह यांनी रायगड किल्ल्यावर आयोजित एका विशेष कार्यक्रमात मोठा संदेश दिला आहे. “रायगड हे केवळ एक ऐतिहासिक पर्यटनस्थळ म्हणून न राहता, येणाऱ्या पिढ्यांसाठी प्रेरणादायी स्थळ बनणार आहे,” असे त्यांनी ठामपणे सांगितले.
ते पुढे म्हणाले, “ही तीच भूमी आहे जिथे छत्रपती शिवाजी महाराजांचा जन्म झाला, राज्याभिषेक पार पडला आणि शेवटचा श्वास घेतला. बालशिवाजी ते छत्रपतींपर्यंतचा संपूर्ण प्रवास इथेच घडला. त्यामुळे रायगडाचा इतिहास म्हणजे प्रेरणादायी कार्याची शिदोरी आहे.”
शालेय विद्यार्थ्यांनी सातवीपासून बारावीपर्यंत या किल्ल्याला भेट दिली पाहिजे, असा त्यांनी आग्रह धरला. “मुलांनी शिवाजी महाराजांच्या विचारांमधून नेतृत्व, शौर्य आणि स्वराज्याच्या मूल्यांची शिकवण घ्यावी,” असे शाह यांनी सांगितले.
शिवाजी महाराजांचे योगदान केवळ महाराष्ट्रापुरते मर्यादित न ठेवता, संपूर्ण देशाने त्यांच्या विचारांचा गौरव करावा, असे आवाहनही त्यांनी उपस्थितांना केले.
अमित शाह म्हणाले की, “शिवाजी महाराज हे स्वाभिमान, समर्पण आणि सुशासन यांचे प्रतीक होते. त्यांची शिकवण प्रत्येक तरुणाने आत्मसात करणे आवश्यक आहे.”
पंतप्रधान नरेंद्र मोदी यांच्या नेतृत्वात देश जगात मान मिळवत आहे, याचे उदाहरण देत शाह म्हणाले की, “काशी विश्वनाथ कॉरिडोर आणि राम मंदिर प्रकल्प ही कामं त्या गौरवशाली वारशाचे आधुनिक प्रतीक आहेत.”
“शिवाजी महाराजांनी नेहमी सांगितले की स्वराज्य, स्वधर्म आणि स्वभाषेसाठीची लढाई कधीही थांबू नये. आजही ही प्रेरणा आपल्याला नव्या उमेदीने पुढे जाण्यास प्रवृत्त करते,” असेही त्यांनी स्पष्ट केले.