शिवसेनेचे नेते आणि मंत्री उदय सामंत यांनी नुकतीच महाराष्ट्र नवनिर्माण सेनेचे प्रमुख राज ठाकरे यांची अचानक भेट घेतली. ही भेट राजकीय पार्श्वभूमीवर झाल्याने, आगामी स्थानिक स्वराज्य संस्थांच्या निवडणुकांच्या तोंडावर शिवसेना (शिंदे गट) आणि मनसे युतीची शक्यता चर्चेत आली. मात्र, या सर्व चर्चांना विराम देत उदय सामंत यांनी स्पष्टपणे सांगितले की, ही भेट पूर्णतः अराजकीय होती आणि केवळ स्नेहभेट म्हणून झाली होती.
उदय सामंत यांनी माध्यमांशी बोलताना सांगितले की, “आज सकाळी मी काही कामासाठी या परिसरात होतो. तिथेच अचानक वाटलं की राज ठाकरे यांना भेटावं. मी त्यांना फोन केला आणि भेटीसाठी येत असल्याचं सांगितलं. त्यांनी देखील लगेच होकार दिला.” त्यांनी पुढे सांगितले, “राज ठाकरेंशी चर्चा केली की अनेक विषयांवर दृष्टिकोन समजतो. विकासाच्या दृष्टिकोनातून त्यांच्याकडे पाहण्यासारखं बरंच काही असतं. त्यामुळे आमच्यात जी चर्चा झाली ती केवळ सामाजिक आणि वैचारिक पातळीवर होती. त्यात कोणतीही राजकीय खिचडी शिजलेली नाही.”
जेव्हा पत्रकारांनी विचारले की, “मुंबई महापालिकेवर काही चर्चा झाली का?” यावर उदय सामंत यांनी उत्तर दिलं, “जर असा काही राजकीय विषय चर्चेला आला असता, तर मी त्याबाबत पत्रकार परिषद घेऊन अधिकृत घोषणा केली असती. पण तसं काही झालं नाही. भेट अगदी स्नेहपूर्ण आणि अराजकीय होती. चहा घेतला, खिचडी खाल्ली आणि निघून आलो.”
या भेटीनंतर उदय सामंत थेट मुख्यमंत्री एकनाथ शिंदे यांच्याकडे जाणार असल्याचेही त्यांनी सांगितले. यावरून काहीजणांनी राज ठाकरे यांच्याशी झालेली चर्चा शिंदे यांना सांगणार असल्याचं भाकीत केलं, मात्र सामंत यांनी स्पष्ट केलं, “असंच काहीही नाही. ही माझी आणि राज ठाकरे यांची चौथी भेट आहे. त्यात काही राजकीय हेतू नसतो.”
या भेटीत मनसे नेते संदीप देशपांडेही उपस्थित होते. त्यांनीही उदय सामंत यांचं म्हणणं दुजोऱ्याने मान्य केलं. ते म्हणाले, “सामंत साहेब येत होते, म्हणून त्यांनी फोन केला आणि ही भेट झाली. दोघांनी एकत्र चहा घेतला, खिचडी खाल्ली. बाकी काहीही विशेष चर्चा नव्हती. उदय सामंत यांचं म्हणणं अगदी खरं आहे.”
याच दरम्यान, शिवसेना (उबाठा गट)मधून काही नेते बाहेर पडत असल्याच्या पार्श्वभूमीवर सामंत यांनी उद्धव ठाकरे यांच्यावर टीका केली. “सध्या अनेक नेते उद्धव ठाकरे यांचा पक्ष सोडत आहेत, ही बाब आत्मचिंतनासारखी आहे. एकनाथ शिंदे यांच्या कार्यशैलीमुळे राज्यभरात शिवसेनेत (शिंदे गट) मोठ्या प्रमाणावर इनकमिंग होत आहे,” असंही त्यांनी स्पष्ट केलं.