केंद्रीय मंत्री आणि भाजप नेत्या रक्षा खडसे यांच्या मुलीच्या छेडछाडीचा धक्कादायक प्रकार उघडकीस आला आहे. या प्रकरणात पाच आरोपींवर गुन्हा दाखल करण्यात आला असून, त्यातील काही जण मुख्यमंत्री एकनाथ शिंदे यांच्या शिवसेना गटाशी संबंधित असल्याची माहिती समोर आली आहे.
अटक व धमकीचा प्रकार
या प्रकरणात अनिकेत भोई याला पोलिसांनी शनिवारी रात्री अटक केली. त्याला पोलीस ठाण्यात नेल्यानंतर त्याने “तुम्ही माझे काहीच वाकडे करू शकत नाही” असे म्हणत पोलिसांनाच धमकी दिल्याचे सूत्रांकडून कळते. यापूर्वीही मुक्ताईनगर पोलीस ठाण्यात अनिकेत भोईवर चार ते पाच गुन्हे दाखल असल्याचे समोर आले आहे.
आरोपींवर दोन स्वतंत्र गुन्हे दाखल
या प्रकरणात दोन वेगवेगळे गुन्हे दाखल करण्यात आले आहेत –
- रक्षा खडसे यांच्या मुली व तिच्या मैत्रिणींची छेडछाड केल्याचा गुन्हा
- यात्रेदरम्यान अंगरक्षक पोलिसाला धक्काबुक्की केल्याचा गुन्हा
या प्रकरणात अनिकेत भोई, पियूष मोरे, सोहम कोळी, अनुज पाटील, किरण माळी, चेतन भोई आणि सचिन पालवे यांच्याविरोधात गुन्हा दाखल करण्यात आला आहे.
शिंदे गटाशी संबंध?
तपासादरम्यान, आरोपी अनिकेत भोई हा आमदार चंद्रकांत पाटील यांचा कट्टर समर्थक तसेच शिवसेना शिंदे गटाचे जिल्हाप्रमुख छोटूभाई यांचा पुतण्या असल्याचे समोर आले आहे. त्याचप्रमाणे,
- पियूष मोरे – शिंदे गटाचा माजी नगरसेवक
- सचिन पालवे – शिंदे गटाचा वैद्यकीय मदत कक्ष प्रमुख
- किरण माळी आणि सोहम कोळी – शिवसेना शिंदे गटाच्या पदाधिकाऱ्यांचे नातेवाईक
या घटनेनंतर राजकीय वर्तुळात चर्चांना उधाण आले असून, पोलिसांकडून अधिक तपास सुरू आहे.