मुख्यमंत्री देवेंद्र फडणवीस आणि महाराष्ट्र नवनिर्माण सेनेचे अध्यक्ष राज ठाकरे यांच्या अलीकडील भेटीने राजकीय वर्तुळात उलटसुलट चर्चा सुरू केल्या आहेत. या बैठकीला राजकीय महत्त्व जोडले जात असतानाच, स्वतः मुख्यमंत्र्यांनी या भेटीमागील कारण स्पष्ट केले आहे.
भेटीमुळे चर्चांना उधाण
अलीकडेच झालेल्या विधानसभा निवडणुकांमध्ये मतमोजणी प्रक्रियेवर मनसेने आक्षेप घेतला होता. राज ठाकरेंनी महायुतीच्या विजयावर प्रश्नचिन्ह उपस्थित करत मतदारांची दिशाभूल झाल्याचा आरोप केला होता. या पार्श्वभूमीवर, मुख्यमंत्री फडणवीस आज सकाळी थेट शिवतीर्थावर पोहोचले आणि राज ठाकरेंची भेट घेतली. ही चर्चा जवळपास तासभर चालली. मात्र, या भेटीवर दोन्ही पक्षांनी मौन बाळगले होते. त्यामुळे राजकीय चर्चांना अधिक हवा मिळाली.
फडणवीसांचं स्पष्टीकरण
या भेटीबाबत मुख्यमंत्र्यांना विचारले असता, त्यांनी स्पष्ट शब्दांत सांगितले की, “ही कुठल्याही राजकीय हेतूने झालेली भेट नव्हती. मुख्यमंत्रीपदाची शपथ घेतल्यानंतर राज ठाकरेंनी मला अभिनंदनाचा फोन केला होता. त्यावेळी मी त्यांना सांगितले होते की, मी त्यांना भेटायला येईन. त्यामुळे मी त्यांच्या घरी गेलो, त्यांच्यासोबत संवाद साधला, नाश्ता केला आणि पुढे निघालो. यात कोणताही राजकीय हेतू नाही.”
निवडणुका डोळ्यांसमोर ठेवून भेट?
राज ठाकरे यांनी अलीकडेच विधानसभा निवडणुकांच्या निकालांवर तिखट प्रतिक्रिया दिल्या होत्या. त्यातच आता स्थानिक स्वराज्य संस्था आणि महापालिकांच्या निवडणुका तोंडावर आहेत. त्यामुळे या भेटीमुळे भविष्यात मनसे आणि भाजप यांच्यात काही राजकीय समीकरणं जुळवली जात आहेत का, याबाबत तर्कवितर्क लावले जात आहेत.
अमित ठाकरे विधानपरिषदेत जाणार?
या भेटीनंतर आणखी एक चर्चेला उधाण आले आहे – ती म्हणजे राज ठाकरेंचे पुत्र अमित ठाकरे यांना विधानपरिषदेत संधी मिळणार का? विधानपरिषदेच्या राज्यपाल नियुक्त सदस्यांच्या 12 पैकी 5 जागा सध्या रिक्त आहेत. अमित ठाकरे यांचा विधानसभा निवडणुकीत पराभव झाल्यानंतर त्यांना भाजपच्या कोट्यातून विधानपरिषदेवर पाठवले जाऊ शकते, अशी चर्चा सुरू झाली आहे. मात्र, यामध्ये किती तथ्य आहे, हे येत्या काळात स्पष्ट होईल.