राज्यातील स्थानिक स्वराज्य संस्थांच्या निवडणुका जवळ येत असताना सर्व राजकीय पक्षांत हालचालींना वेग आला आहे. नाशिक, पुणे, मुंबई यांसारख्या महत्त्वाच्या महापालिकांवर ताबा मिळवण्यासाठी विविध पक्षांनी रणनीती आखायला सुरुवात केली आहे. युती व आघाड्यांचा चर्चेचा माहोल पुन्हा एकदा गडद झाला आहे. अशा पार्श्वभूमीवर शिवसेनेच्या नेत्या आणि विधान परिषदेच्या उपसभापती नीलम गोऱ्हे यांनी महत्त्वाचे वक्तव्य केले आहे.
पुण्यात आयोजित केलेल्या शिवसेनेच्या सभासद नोंदणी अभियानाच्या कार्यक्रमात बोलताना गोऱ्हे म्हणाल्या, “मुंबई आणि ठाणे या ठिकाणी युती शक्य असली, तरी राज्यातील इतर महापालिकांमध्ये युती होणं कठीण आहे.” तसेच, कार्यकर्त्यांना मार्गदर्शन करताना त्यांनी स्पष्ट केलं की, “जर युती झाली तर आनंदाची गोष्ट आहे, पण त्यावर अवलंबून राहू नका. स्वतःच्या ताकदीवर लढण्याची तयारी ठेवा.”
यावेळी गोऱ्हे यांनी पुढे सांगितलं की, “मुख्यमंत्री एकनाथ शिंदे यांनी सभासद नोंदणी मोहिमेला गती देण्याचे आदेश दिले आहेत. त्यानुसार पुण्यातील काही विधानसभा क्षेत्रांमध्ये लवकरच सभासद नोंदणी मोहीम सुरू होईल.”
दरम्यान, उपमुख्यमंत्री एकनाथ शिंदे आणि मनसे अध्यक्ष राज ठाकरे यांच्या नुकत्याच झालेल्या भेटीवर प्रश्न विचारण्यात आला असता, गोऱ्हेंनी संयमित प्रतिक्रिया दिली. त्या म्हणाल्या, “मुंबई महापालिकेच्या निवडणुकीसाठी शिवसेना आणि मनसेमध्ये युती होणार का, हे ठरवण्याचा अधिकार आमचे वरिष्ठ नेते एकनाथ शिंदे, देवेंद्र फडणवीस आणि अजित पवार यांच्याकडे आहे. आपण आपल्या जबाबदाऱ्या नीट पार पाडाव्यात आणि पक्षवाढीसाठी प्रयत्नशील राहावं, एवढंच मला सांगायचं आहे.”
याशिवाय, उद्धव ठाकरे यांच्या नाशिकमधील मेळाव्याच्या पार्श्वभूमीवरही नीलम गोऱ्हे यांनी टीका केली. या मेळाव्यात बाळासाहेब ठाकरे यांच्या एआय आवाजातील भाषण वाजवण्यात आलं होतं. यावर प्रतिक्रिया देताना गोऱ्हे म्हणाल्या, “ही टेक्नॉलॉजीचा उपयोग करून तयार केलेली क्लिप आहे. बाळासाहेब ठाकरे यांनी आपल्या काळात काँग्रेसवर कठोर टीका केली होती. त्याच वेळी त्यांनी म्हटलं होतं की जर मी पंतप्रधान असतो, तर लाल चौकात ध्वज फडकावला असता. आज नरेंद्र मोदी आणि अमित शहा यांनीच ते काम केलं आहे. कलम 370 हटवून तीन तलाकसारखा कायदा देखील आणला. त्यामुळे खरी शिवसेना आज एकनाथ शिंदे यांच्या नेतृत्वाखाली पुढे जात आहे.”
अशा प्रकारे, गोऱ्हे यांनी अप्रत्यक्षपणे ठाकरे गटावर निशाणा साधत, आपणच बाळासाहेबांच्या विचारांना पुढे नेत आहोत, असा ठाम संदेश दिला.