आज संपूर्ण महाराष्ट्रात मराठी राजभाषा दिन मोठ्या उत्साहात साजरा केला जात आहे. राज्यभरातील शैक्षणिक संस्था, सांस्कृतिक संघटना आणि राजकीय पक्ष विविध कार्यक्रमांचे आयोजन करून मराठीचा गौरव साजरा करत आहेत.
“मराठी भाषेचा सन्मान वाढवण्यासाठी ठोस पावले”
मराठी भाषेला अभिजात दर्जा मिळाल्यानंतर हा पहिला मराठी भाषा दिन असल्याने यंदाचा सोहळा अधिक भव्य स्वरूपात आयोजित केला जात आहे. शिवसेना (उद्धव बाळासाहेब ठाकरे) पक्षातर्फेही विशेष कार्यक्रम आयोजित करण्यात आला आहे. न्यू मरीन लाईन्स येथील बिर्ला मातोश्री सभागृहात संध्याकाळी ५ ते ९ या वेळेत हा भव्य सांस्कृतिक सोहळा पार पडणार आहे.
“माय मराठीचा जागर”
या सोहळ्यात मराठी संगीत, काव्य आणि भाषेच्या महत्त्वावर आधारित कार्यक्रम सादर केले जाणार आहेत. संपूर्ण मरीन लाईन्स परिसर भगव्या झेंड्यांनी सजवला जाईल आणि “माय मराठी”च्या घोषणांनी परिसर दुमदुमून जाईल.
“उद्धव ठाकरे यांचे मार्गदर्शन”
या सोहळ्याला शिवसेना प्रमुख उद्धव ठाकरे मार्गदर्शन करणार असून, मराठीच्या भविष्यासाठी कोणती दिशा घ्यावी, यावर ते आपले विचार मांडणार आहेत.
मराठी भाषा टिकवण्यासाठी आणि तिचा अधिकाधिक प्रचार व प्रसार करण्यासाठी या सोहळ्यात महत्त्वपूर्ण ठराव मांडले जाण्याची शक्यता आहे.