पुण्यातील स्वारगेट बसस्थानकात 25 फेब्रुवारी रोजी एका 26 वर्षीय तरुणीवर अत्याचार झाल्याची धक्कादायक घटना उघडकीस आली. या घटनेनंतर राज्यभर तीव्र संतापाची लाट उसळली. या प्रकरणातील मुख्य आरोपी दत्तात्रय गाडे याला पोलिसांनी 72 तासांच्या शोध मोहिमेनंतर अटक केली. शुक्रवारी संध्याकाळी त्याला न्यायालयात हजर करण्यात आले, जिथे पोलिसांनी 14 दिवसांच्या पोलीस कोठडीची मागणी केली.
कोर्टातील युक्तीवाद आणि बचाव पक्षाचा दावा
न्यायालयीन सुनावणीदरम्यान आरोपीच्या वकिलांनी दावा केला की, संबंधित तरुणी स्वतःहून बसमध्ये गेली होती आणि हे संबंध परस्पर संमतीने झाले आहेत. त्यामुळे आरोपीला फक्त दोन दिवसांची पोलीस कोठडी द्यावी, अशी मागणी बचाव पक्षाकडून करण्यात आली. तसेच, आरोपीला माध्यमांमध्ये उघडपणे दाखवले जात असताना, त्याला कोर्टात बुरखा घालून का आणले, असा प्रश्नही उपस्थित करण्यात आला.
सरकारी पक्षाचा युक्तिवाद आणि न्यायालयाचा निर्णय
सरकारी पक्षाने बचाव पक्षाचा दावा फेटाळून लावत सांगितले की, आरोपीने विश्वासघाताने फिर्यादीला फसवले आणि त्याच्यावर आधीपासूनच सहा गुन्ह्यांचे आरोप आहेत, त्यापैकी पाच फिर्यादी महिला आहेत. त्यामुळे आरोपीचा महिलांविषयीचा दृष्टिकोन लक्षात घेऊन त्याच्या गुन्हेगारी पार्श्वभूमीचा सखोल तपास करणे आवश्यक आहे.
पोलिसांनी न्यायालयात सांगितले की, आरोपीच्या इतर गुन्ह्यांची चौकशी करणे गरजेचे आहे. गुन्हा घडला त्यावेळी त्याच्याकडे मोबाईल होता का, गुन्हा केल्यानंतर तो कोणाच्या संपर्कात होता, यासह अनेक महत्त्वाचे तपशील तपासायचे आहेत. या सर्व कारणांमुळे पोलिसांनी 14 दिवसांच्या कोठडीची मागणी केली होती.
दोन्ही बाजूंच्या युक्तिवादानंतर न्यायालयाने आरोपीला 12 मार्चपर्यंत पोलीस कोठडी सुनावली आहे. आता या प्रकरणाचा सखोल तपास करून सत्य समोर आणण्याचे मोठे आव्हान पोलिसांसमोर आहे.