जम्मू-काश्मीरमधील निसर्गसंपन्न पहलगाम भागात भीषण दहशतवादी हल्ला घडला असून, या हल्ल्यात महाराष्ट्रातील दोन नागरिकांनी आपले प्राण गमावले आहेत. उपमुख्यमंत्री एकनाथ शिंदे यांनी दिलेल्या माहितीनुसार दिलीप डिसले आणि अतुल मोने या दोघांचा मृत्यू झाला आहे. या घटनेत आणखी दोन महाराष्ट्रातील व्यक्ती जखमी झाल्याचे सांगण्यात आले आहे.
हल्ल्यानंतर मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांनी या अमानुष कृत्याचा जोरदार शब्दांत निषेध केला आहे. फडणवीस यांनी या घटनेत मृत्युमुखी पडलेल्यांना भावपूर्ण श्रद्धांजली अर्पण केली असून, त्यांच्या कुटुंबीयांच्या दुःखात राज्य सरकार सहभागी असल्याचे स्पष्ट केले आहे. त्यांनी तसेच जखमी पर्यटकांच्या प्रकृतीत लवकर सुधारणा व्हावी यासाठी प्रार्थना केली.
मुख्यमंत्री फडणवीस यांनी सांगितले की, जम्मू-काश्मीर प्रशासनातील वरिष्ठ अधिकाऱ्यांशी संपर्क साधून परिस्थितीचा आढावा घेतला जात आहे. काश्मीरचे विभागीय आयुक्त विजयकुमार बिदरी यांच्याशीही थेट संवाद साधून माहिती घेतली आहे. आतापर्यंतच्या माहितीनुसार, मृतांमध्ये दिलीप डिसले आणि अतुल मोने यांचा समावेश आहे. तसेच जखमींमध्ये पनवेलचे माणिक पटेल आणि एस. भालचंद्रराव यांचा समावेश असून, सुदैवाने त्यांची प्रकृती स्थिर असल्याचे सांगण्यात आले.
दरम्यान, उपमुख्यमंत्री एकनाथ शिंदे यांनीदेखील या हल्ल्याचा तीव्र निषेध केला आहे. त्यांनी नमूद केले की, “निरपराध पर्यटकांवर हल्ला करणे ही कसलाही शौर्याची निशाणी नाही, तर हा भ्याडपणा आहे.” शिंदे यांनी सांगितले की, भारताचे पंतप्रधान नरेंद्र मोदी आणि गृहमंत्री अमित शाह हे दहशतवाद्यांना कठोर प्रत्युत्तर देतील आणि या हल्ल्याचा योग्य बदला घेतला जाईल.
शिंदे यांनी पुढे माहिती दिली की, घटनेच्या वेळी उपस्थित असलेल्या प्रगती जगदाळे या तरुणीशी त्यांनी थेट संवाद साधला. तिने सांगितले की, तिच्यासमोर तिच्या वडिलांचे आणि काकांचे नाव विचारून त्यांच्यावर गोळ्या झाडण्यात आल्या. हा अनुभव ऐकताना झालेली भीती आणि घबराट स्पष्ट दिसून आली. शिंदे यांनी विश्वास दिला की, सर्व जखमी आणि प्रभावित नागरिकांना लवकरात लवकर महाराष्ट्रात सुखरूप परत आणले जाईल आणि त्यांना आवश्यक ती सर्व मदत दिली जाईल.
संपूर्ण देशात या भ्याड हल्ल्याचा निषेध व्यक्त केला जात आहे. या घटनेमुळे जम्मू-काश्मीरमधील सुरक्षिततेचा प्रश्न पुन्हा ऐरणीवर आला आहे. केंद्र सरकार आणि जम्मू-काश्मीर प्रशासन या प्रकारावर ठोस उपाययोजना करतील, अशी अपेक्षा सर्वत्र व्यक्त केली जात आहे.