पश्चिम बंगालमध्ये सध्या राजकीय वातावरण चांगलेच तापले आहे. विधानसभा निवडणुका जवळ येत असतानाच, भाजप नेते आणि विधानसभेतील विरोधी पक्षनेते सुवेंदु अधिकारी यांनी एक धक्कादायक मागणी केली आहे. त्यांनी राज्य निवडणूक आयोगाकडे हिंदू आणि मुस्लिम समुदायासाठी स्वतंत्र मतदान केंद्रे उभारण्याची विनंती केली आहे.
अधिकारी यांनी आपली भूमिका स्पष्ट करताना म्हटलं की, जिथे हिंदू मतदारसंख्या ५० टक्क्यांपेक्षा कमी आहे, अशा भागांमध्ये हिंदूंना स्वतंत्र पोलिंग बूथची गरज आहे. त्यांच्या मते, हिंदू मतदारांना मुस्लिम बहुल वस्तीतून मतदानासाठी जावं लागतं आणि त्यामुळे त्यांच्यावर हल्ल्याचा धोका वाढतो. अशा परिस्थितीत हिंदूंना मतदान करण्यापासून रोखण्याचे प्रकार घडत असल्याचा आरोप त्यांनी केला.
‘हिंदू सुरक्षित नाहीत’
सुवेंदु अधिकारी यांनी राज्यातील सध्याच्या परिस्थितीवर जोरदार टीका केली. त्यांनी सांगितलं की, “ममता बॅनर्जी यांच्या सरकारच्या चुकीच्या धोरणांमुळे हिंदू नागरिक असुरक्षिततेच्या भावनेत जगत आहेत. अनेक ठिकाणी हिंदूंना त्यांच्या लोकशाही हक्कांचा वापर करता येत नाही. मतदान करण्यासाठीसुद्धा त्यांना अडथळे निर्माण केले जात आहेत.”
त्यांनी अधिक स्पष्टपणे सांगितलं की, ज्या ठिकाणी हिंदू अल्पसंख्यांक आहेत, तिथे त्यांना मुस्लिम बहुल भागातून मतदानासाठी जावं लागतं, त्यामुळे त्यांच्यावर शारीरिक किंवा मानसिक दबाव टाकला जातो. म्हणूनच, हिंदू मतदारांना सुरक्षित वातावरण मिळावे यासाठी स्वतंत्र मतदान केंद्रांची उभारणी आवश्यक असल्याचं त्यांनी निवडणूक आयोगाकडे ठामपणे मांडलं.
वक्फ सुधारणा विधेयकानंतरचे तणावाचे वातावरण
सध्या पश्चिम बंगालमध्ये वक्फ सुधारणा विधेयकावरून मोठ्या प्रमाणावर तणावाचं वातावरण आहे. मुर्शिदाबादसारख्या जिल्ह्यांमध्ये यानिमित्ताने साम्प्रदायिक हिंसाचारही झाला आहे. या पार्श्वभूमीवर भाजपने टीएमसी सरकारवर जोरदार टीका करत आरोप केला आहे की, सरकार केवळ मुस्लिम मतांची तुष्टी साधण्यासाठी हिंदूंना दुर्लक्षित करत आहे.
भाजपच्या मते, राज्यातील सत्ताधाऱ्यांनी हिंदूंना संरक्षण देण्यात अपयश पत्करलं असून, फक्त एका समुदायाचा आधार घेऊन राजकारण केलं जात आहे. सुवेंदु अधिकारी यांच्या या मागणीमुळे आगामी निवडणुकीच्या पार्श्वभूमीवर बंगालमध्ये धार्मिक ध्रुवीकरण वाढण्याची शक्यता वर्तवली जात आहे.
राजकीय उलथापालथीचे संकेत
या मागणीनंतर पश्चिम बंगालमध्ये राजकीय वातावरण अजूनही तापू शकते. सत्ताधारी टीएमसीने या आरोपांना काय उत्तर देणार, याकडे सगळ्यांचं लक्ष लागलं आहे. एकंदरीत, आगामी निवडणुकीपूर्वी पश्चिम बंगालमध्ये धर्माच्या आधारावर राजकीय समीकरणं नव्याने रचली जातील, असा अंदाज राजकीय वर्तुळात वर्तवला जात आहे.