जम्मू-काश्मीरमधील सुंदर पण सध्या अस्थिर अशा पहलगाम परिसरातील बैसरन खोऱ्यात अलीकडेच घडलेल्या दहशतवादी हल्ल्याने देशभरात संतापाची लाट उसळली आहे. या भयानक घटनेत 26 निरपराध पर्यटकांनी आपले प्राण गमावले, तर 20 हून अधिकजण गंभीर जखमी झाले आहेत. या हल्ल्यात विशेषतः हिंदू पर्यटकांना लक्ष्य करण्यात आलं, जे केवळ त्यांच्या धर्माच्या आधारावर ठार करण्यात आले.
ही अमानुष घटना समोर आल्यानंतर देशभरातील अनेक नागरिक, सामाजिक कार्यकर्ते आणि कलाकारांनी सोशल मीडियावर तीव्र प्रतिक्रिया दिल्या. त्यामध्ये बॉलिवूडमधील प्रसिद्ध गायक सलीम मर्चंट यांचा व्हिडीओ विशेष लक्ष वेधून घेत आहे. या व्हिडीओत त्यांनी आपल्या भावना अत्यंत भावनिक आणि स्पष्ट शब्दांत मांडल्या.
सलीम मर्चंट म्हणाले, “आज मी एका मुस्लीम व्यक्ती म्हणून स्वतःच्या धर्माविषयी लाज वाटते असं वाटू लागलं आहे. अशा निर्दोष लोकांना केवळ त्यांचा धर्म हिंदू असल्यामुळे मारलं गेलं, ही गोष्ट अंतःकरणाला हादरवणारी आहे. हे अतिरेकी खरंच मुस्लीम आहेत का? नाही! ते केवळ दहशतवादी आहेत. कारण कुठलाही खरा धर्म, विशेषतः इस्लाम, अशी अमानुष कृत्यं कधीच शिकवत नाही.”
ते पुढे म्हणाले की, कुराण शरीफच्या सूरह अल-बकराहच्या 256व्या आयतात स्पष्टपणे नमूद आहे की, ‘धर्मात कोणतीही जबरदस्ती नसते’. इस्लाम शांततेचा, सहिष्णुतेचा संदेश देतो. परंतु अशा घटनांमुळे संपूर्ण धर्माचं नाव बदनाम होतं आणि सामान्य मुस्लीम नागरिकांनाही स्पष्टीकरण द्यावं लागतं, ही बाब फारच दुःखद आहे.
सलीमने आपल्या भावनिक उद्गारांमध्ये काश्मीरमधील सामान्य लोकांबद्दलही चिंता व्यक्त केली. “गेल्या काही वर्षांत तिथे परिस्थिती सुधारत होती. स्थानिक लोक आणि पर्यटक सुरक्षितपणे फिरत होते. पण आता पुन्हा भीतीचं वातावरण निर्माण झालं आहे. याचा फटका तिथल्या सामान्य जनतेलाच बसणार आहे,” असं ते म्हणाले.
कॉमेडियन मुनव्वर फारुकी यांनीही सलीमचा व्हिडीओ शेअर करत मृतांप्रती श्रद्धांजली वाहिली. त्यांनी लिहिलं, “मी नम्रतेने त्या सर्व निरपराध लोकांसाठी प्रार्थना करतो. देव त्यांना शांती देवो आणि त्यांच्या कुटुंबीयांना या दुःखातून सावरण्याची शक्ती देवो.”
सध्या संपूर्ण देशात या हल्ल्याच्या निषेधाची लाट उसळली आहे. अनेक सेलिब्रिटी आणि नागरिकांनी या अमानुष कृत्याबद्दल कठोर कारवाईची मागणी केली आहे. दरम्यान, केंद्र सरकारनेही तातडीने सर्वपक्षीय बैठक बोलावली असून, हल्ल्यासंदर्भात सविस्तर माहिती देण्याची तयारी सुरु आहे.