राज ठाकरे आणि उद्धव ठाकरे यांच्या राजकीय एकतेची शक्यता अलीकडेच चर्चेचा विषय ठरली आहे. राज ठाकरेंनी नुकत्याच एका भाषणात म्हटले की, “आपल्यामधील वाद छोटे आहेत, महाराष्ट्र मोठा आहे,” असे सांगत त्यांनी आगामी काळात उद्धव ठाकरे यांच्या नेतृत्वाखालील पक्षाशी मनसेची युती होण्याचे संकेत दिले. त्यांच्या या विधानाने संपूर्ण महाराष्ट्रात नवी राजकीय चर्चा सुरू झाली आहे.
याच पार्श्वभूमीवर, शिवसेना (ठाकरे गट) नेते आणि माजी खासदार चंद्रकांत खैरे यांनी भावनिक प्रतिक्रिया दिली. त्यांनी सांगितले की, राज ठाकरे आणि उद्धव ठाकरे एकत्र येण्याच्या चर्चेमुळे त्यांच्या डोळ्यांत पाणी आले. “गेल्या कित्येक वर्षांपासून हा क्षण पाहण्यासाठी आतुर होतो. आज जे काही घडते आहे, ते पाहून मन भरून आले,” असे खैरे म्हणाले. ते टीव्ही९ मराठीशी बोलत होते.
खैरे यांनी त्यांच्या दीर्घकालीन ठाकरे घराण्याशी असलेल्या नात्याचा उल्लेख करत म्हटले की, “मी मातोश्रीप्रेमी आहे, ठाकरे कुटुंबाशी माझे जुने ऋणानुबंध आहेत. ठाकरे बंधू जर पुन्हा एकत्र आले तर महाराष्ट्रात एक मोठा चमत्कार घडू शकतो.” त्यांनी असा दावा केला की महाराष्ट्राच्या राजकारणात फक्त ठाकरे ब्रँड आहे आणि इतर कोणताही ब्रँड त्यांच्याशी स्पर्धा करू शकत नाही.
महापालिकेच्या आगामी निवडणुकांबाबतही खैरे यांनी मत मांडले. “जर राज ठाकरे आणि उद्धव ठाकरे एकत्र आले, तर सर्व महापालिकांमध्ये मोठा बदल घडेल. दोघे मिळून जो काही निर्णय घेतील, तो आम्हाला पूर्णपणे मान्य असेल,” असे त्यांनी ठामपणे सांगितले.
दरम्यान, ठाकरे बंधूंच्या एकत्र येण्याच्या शक्यतेने कार्यकर्त्यांमध्येही उत्सुकता वाढली आहे. मात्र, राज ठाकरे यांनी आपल्या पक्षातील नेते व कार्यकर्त्यांना स्पष्ट आदेश दिले आहेत की युतीच्या चर्चेबाबत कोणताही खुलासा किंवा वक्तव्य करू नये. सध्या राज ठाकरे परदेशात असून, ते महाराष्ट्रात परतल्यानंतर युतीबाबत अधिकृत भूमिका स्पष्ट करतील, असे सांगितले जात आहे.
महाराष्ट्राच्या राजकारणात अनेक वळणं पाहायला मिळाली आहेत, मात्र ठाकरे बंधूंच्या संभाव्य एकतेमुळे राज्यात एक नवा राजकीय अध्याय सुरू होऊ शकतो, अशी शक्यता वर्तवली जात आहे. लोकांच्या अपेक्षा उंचावल्या आहेत आणि सर्वांचे लक्ष आता ठाकरे बंधूंवर केंद्रित झाले आहे.