माजी मंत्री आणि राष्ट्रवादी काँग्रेसचे नेते जितेंद्र आव्हाड यांनी इतिहास अभ्यासक इंद्रजीत सावंत यांना मिळालेल्या धमकीवर तीव्र नाराजी व्यक्त केली आहे. त्यांनी या घटनेवर संताप व्यक्त करत, ‘‘आता मला स्वतःचीच लाज वाटतेय. आपण स्वतःला खरेच मर्द समजतो का?’’ असा सवाल उपस्थित केला.
सावंत यांना कथितपणे प्रशांत कोरटकर नावाच्या व्यक्तीने धमकी दिल्याचे समोर आले आहे. यावर बोलताना आव्हाड यांनी कोरटकर आणि राहुल सोलापूरकर यांच्यावर कठोर कारवाईची मागणी केली आहे. तसेच, त्यांनी या प्रकरणाला राजकीय आश्रय असल्याचा आरोप करत, दोषींना तातडीने अटक करण्याची गरज असल्याचे सांगितले.
दरम्यान, राज्याचे गृहराज्यमंत्री योगेश कदम यांनी पुण्यातील एका बलात्कार प्रकरणावर दिलेल्या विधानावरही आव्हाड संतापले. ‘‘आपला मंत्री म्हणतो की पीडित तरुणीने आवाज का उठवला नाही? अशा प्रकारची वक्तव्ये करण्यापूर्वी मंत्रीपदाची जबाबदारी लक्षात घ्यायला हवी,’’ अशी टीका त्यांनी केली.
याशिवाय, राज्यात सुरू असलेल्या नंबर प्लेट घोटाळ्यावरही त्यांनी प्रकाश टाकत, ‘‘तीनपट जादा पैसे घेऊन नंबर प्लेट जारी केल्या जात आहेत. हा भ्रष्टाचार अधिकाऱ्यांच्या संगनमताने सुरू आहे, आणि काही दिवसांत हे अधिकारी महाराष्ट्र विकतील,’’ असे परखड मत व्यक्त केले.
या संपूर्ण प्रकरणावर सध्या राज्यभरात तीव्र प्रतिक्रिया उमटत असून, विविध राजकीय नेते आणि संघटना इंद्रजीत सावंत यांच्या समर्थनार्थ उभ्या राहिल्या आहेत. पोलिस या प्रकरणाची चौकशी करत असून, आरोपींचा शोध घेत आहेत.