भाजपचे ज्येष्ठ नेते आणि उच्च व तंत्रशिक्षण मंत्री चंद्रकांत पाटील यांनी अलीकडेच त्यांच्या मंत्रिपदाबाबत एक महत्त्वाचं वक्तव्य करून राजकीय वर्तुळात चर्चा निर्माण केली आहे. सांगली जिल्ह्यातील तासगाव येथे एका सांस्कृतिक कार्यक्रमात बोलताना त्यांनी नमूद केलं की, महाराष्ट्रातील जवळपास सर्व खात्यांमध्ये त्यांनी आपला सहभाग नोंदवला आहे, आता फक्त गृहखातंच मिळणं बाकी आहे.
तासगावमध्ये शिवेनारी कला, क्रीडा आणि सांस्कृतिक मंडळाच्या वतीने आयोजित कार्यक्रमात दुर्गामाता मंदिराच्या लोकार्पण सोहळ्यात चंद्रकांत पाटील बोलत होते. आपल्या भाषणात त्यांनी महिलांसाठी खास आरोग्यसेवा सुरू करण्याची घोषणा केली. ते म्हणाले की, महिलांच्या विविध आजारांवर मोफत उपचार देणारे रुग्णालय उभारले जाईल. यामध्ये रक्त तपासणी, इंजेक्शन, औषधोपचार, प्रसूती आणि शस्त्रक्रिया यांसारख्या सेवा मोफत दिल्या जातील. विशेष म्हणजे हे रुग्णालय जिजामाता यांच्या नावाने स्थापन केले जाईल.
चंद्रकांत पाटील यांनी स्पष्टपणे सांगितले की, ही कोणतीही सरकारी योजना नाही. त्यांनी स्वतःच्या खिशातून निधी उभारून हा उपक्रम राबविणार असल्याचेही नमूद केले. सरकारी योजना वेगळ्या आहेत आणि त्यांचं काम सरकारच करेल, असं सांगून त्यांनी आपली स्वतंत्र सामाजिक बांधिलकीही अधोरेखित केली.
गृहमंत्रिपदाच्या संदर्भात बोलताना त्यांनी हलक्याफुलक्या शब्दांत म्हटलं, “महाराष्ट्रात फक्त गृहखातं राहिलंय, बाकी सर्व खाती माझ्याकडे आली आहेत.” त्यांच्या या विधानामुळे राजकीय वर्तुळात चर्चा सुरू झाली आहे की चंद्रकांत पाटील अप्रत्यक्षपणे गृहमंत्रिपदाची इच्छा व्यक्त करत आहेत का?
यानंतर आपल्या भाषणात त्यांनी तरुणाईच्या भवितव्याबाबतही चिंता व्यक्त केली. त्यांनी उपस्थितांना सांगितले की, व्यसनाधीन तरुणांना सामाजिक संघटनांमध्ये स्थान देऊ नये. तंबाखू किंवा व्यसन करणाऱ्या व्यक्तींना मंडळात सहभागी करून घेऊ नका, असा सल्ला त्यांनी दिला. काही देशांत तरुणांची संख्या घटल्याने भारतीय तरुणांना तिथे कामासाठी मागणी वाढली आहे, असे उदाहरण त्यांनी दिलं. जर्मनीने महाराष्ट्राकडून चार लाख तरुणांची मागणी केली असून, आपण सध्या फक्त दहा हजार तरुण तिकडे पाठवले आहेत, असेही त्यांनी नमूद केले.
अखेर, महिलांसाठी उपयुक्त उपक्रम हाती घ्या आणि समाजात नवे प्रयोग करा, असं आवाहन करत चंद्रकांत पाटील यांनी आपले भाषण संपवलं.
त्यांच्या या विधानामुळे आगामी काळात महाराष्ट्राच्या राजकारणात काही बदल घडतील का, याकडे सर्वांचे लक्ष लागले आहे.