स्टँड-अप कॉमेडियन कुणाल कामरावर उपमुख्यमंत्री एकनाथ शिंदे यांच्याविषयी सादर केलेल्या विडंबनात्मक गाण्यावरून मुंबई पोलिसांनी गुन्हा दाखल केला होता. यासंदर्भात त्याने मुंबई उच्च न्यायालयात दाखल केलेल्या याचिकेवर आज महत्त्वपूर्ण सुनावणी पार पडली. न्यायालयाने पोलिसांना स्पष्ट शब्दांत फटकारत म्हटले की, कामराच्या जबाबासाठी अटकेची गरज नाही, तसेच त्याचा जबाब तामिळनाडूत जाऊनही नोंदवता येऊ शकतो.
या सुनावणी दरम्यान न्यायमूर्तींनी पोलिसांच्या भूमिकेवर प्रश्नचिन्ह उपस्थित केले. कामरा यांनी उपमुख्यमंत्र्यांच्या वैयक्तिक जीवनावर नव्हे, तर सार्वजनिक धोरणांवर विनोदी शैलीत प्रतिक्रिया दिली होती. त्यामुळे त्यांच्यावर कारवाई करण्याची गरज का भासते, असा सवाल न्यायालयाने उपस्थित केला. त्याचबरोबर, कुणाल कामराच्या सुरक्षेचा विचार न करता त्याला चौकशीसाठी स्वतः हजर राहण्याचे निर्देश देणे कितपत योग्य आहे, यावरही न्यायालयाने ताशेरे ओढले.
सरकारी वकील ॲड. हितेन वेणूगावकर यांनी या याचिकेला विरोध करत ती फेटाळून लावण्याची विनंती केली. मात्र, अ‍ॅड. नवरोज सीरवी यांनी कामराची बाजू ठामपणे मांडली. कामरा यांचे स्टेटमेंट पोलिसांना हवे असल्यास, ते तिथे जाऊन घेण्यास अडचण काय? असा सवालही कोर्टाने केला.
न्यायालयाने या प्रकरणात एक महत्त्वाची बाब स्पष्ट केली की, कुणाल कामरावर अटक करण्याची गरज नाही. पोलिसांनीही आपल्या पहिल्या समन्समध्ये हेच नमूद केले आहे की, चौकशीसाठी उपस्थिती आवश्यक असली तरी अटक करण्याचा उद्देश नाही. विशेष म्हणजे, भारतीय दंड संहिता कलम ३५(३) अंतर्गत अशा प्रकरणांत अटकेची आवश्यकता नसते.
कोर्टाने पुढे असेही सूचित केले की, जर कुणाल कामरा सध्या मुंबईबाहेर तामिळनाडूत राहत असतील, तर स्थानिक पोलिसांच्या मदतीने तिथेच त्यांचा जबाब नोंदवता येऊ शकतो. या सगळ्या पार्श्वभूमीवर, कुणाल कामराला कोर्टाकडून मोठा दिलासा मिळाला असून त्याला अटक केली जाणार नसल्याचे स्पष्ट करण्यात आले आहे.
या सुनावणीमुळे अभिव्यक्ती स्वातंत्र्य, व्यंगात्मक सादरीकरण आणि कायद्याचा योग्य वापर याबाबत एक महत्त्वाचा संदेश समाजाला मिळतो. कोर्टाने आपला अंतिम निर्णय राखून ठेवला असला तरी, सध्यासाठी तरी कुणाल कामरा अटकेपासून वाचले आहेत आणि त्यांना दिलासा मिळाला आहे.