दादर येथे आयोजित भारतीय कामगार सेनेच्या मेळाव्यात शिवसेना पक्षप्रमुख उद्धव ठाकरे यांनी आपल्या सरकारच्या पाडण्यात भाजपच्या कारस्थानाचा मोठा आरोप केला. पहिल्यांदाच त्यांनी सरकार पाडल्यामागचं कथित षड्यंत्र उघड करत भाजपवर जोरदार टीका केली.
उद्धव ठाकरे म्हणाले की, “अरविंद हा केंद्रीय मंत्री होता आणि मी मुख्यमंत्री. काही गोष्टींवर आपल्यात सहमती झाली नाही म्हणूनच भाजपला त्याचा राग आला. ज्या दिवशी मला समजलं की दिल्लीत बसलेले दोन भाजप नेते आपल्याला फसवत आहेत, तेव्हा मी अरविंदला फोन करून राजीनामा देण्यास सांगितलं. त्याने कुठलाही सवाल न करता ‘येस सर’ म्हणत तात्काळ राजीनामा दिला.”
ठाकरे यांनी असा आरोप केला की, “एका केंद्रीय मंत्र्याचा राजीनामा मिळूनही ना पंतप्रधानांनी ना भाजप अध्यक्षांनी काही विचारणा केली. त्यामुळे भाजपचा खरा हेतू समोर आला. अरविंदसारखा विरोध करणारा मंत्री त्यांना नको होता, त्यामुळे त्यांनी त्याला दूर केलं. त्यानंतर मला देखील सरकार चालवायला विरोध सुरु झाला, कारण मी उद्योगपतींच्या फायद्यासाठी काही बिलं पास करायला नकार दिला होता. त्यामुळे उद्धव ठाकरेचं सरकार पाडण्याचा कट रचला गेला.”
तसेच, शिवसेनेत पद वाटप करताना होणाऱ्या नाराजीबाबतही उद्धव ठाकरे यांनी मत मांडलं. “एकाच पदासाठी अनेक उमेदवार असतात. निवड करताना काही जण नाराज होतात. पण तुम्ही माझ्यासोबत राहिलात, यासाठी मी तुमचं आभार मानतो. जर कोणी पद मिळालं नाही म्हणून नाराज असेल, तर युवासेनेत जाऊन काम करा,” असे त्यांनी सांगितले.
कामगार सेनेबाबत बोलताना ठाकरे म्हणाले, “शाखा ही आपली खरी ताकद आहे. पदाधिकाऱ्यांनी कार्यालये उघडून कामगारांच्या अडचणी सोडवाव्यात. आठवड्यातून एकदा तरी शाखेत जावं. उद्योग, धंदे किंवा नोकऱ्या यामध्ये आपली माणसं असली पाहिजेत. कामगार सेनेत असून बाहेर इतर पक्षात जाणं हा दुटप्पीपणा आम्ही सहन करणार नाही.”
शेवटी, ठाकरे यांनी सांगितलं की, “शिवसेना ही केवळ ‘वापरा आणि फेका’साठी नाही, तर मराठी माणसाच्या न्यायहक्कांसाठी आहे. ज्यांना कामगार कायदे चांगले समजतात, अशा शिवसैनिकांनाच पद देण्यात यावं आणि संघटना स्वच्छ ठेवावी.”