अमरावतीकरांसाठी एक ऐतिहासिक क्षण ठरलेला आहे – शहरातील विमानतळ आता सर्वसामान्य जनतेसाठी खुला करण्यात आला आहे. मुख्यमंत्री देवेंद्र फडणवीस यांच्या हस्ते या विमानतळाचं लोकार्पण करण्यात आलं. राज्याचे दोन्ही उपमुख्यमंत्री – एकनाथ शिंदे आणि अजित पवार, तसेच अनेक मंत्री आणि अधिकारी यावेळी उपस्थित होते.
या सोहळ्यादरम्यान मुख्यमंत्र्यांनी आपल्या भावना व्यक्त करताना अमरावतीसोबतचं आपलं वैयक्तिक नातं अधोरेखित केलं. “माझी आई अमरावतीची असल्यामुळे या शहराचं माझ्यावर एक वेगळंच ऋण आहे. इथलं प्रगतीचं दृश्य पाहून मला आणि माझ्या आईला विशेष आनंद मिळतो,” असं ते म्हणाले.
फडणवीस यांनी केंद्र सरकारच्या सहकार्यामुळे हा प्रकल्प वेगाने पूर्ण झाल्याचं सांगितलं. 2019 मध्ये सुरू झालेलं काम काही अडचणींमुळे थांबलेलं होतं, परंतु शिंदे सरकारच्या स्थापनेनंतर याला पुन्हा गती मिळाली. आता या विमानतळाच्या माध्यमातून अमरावती ते मुंबई अंतर अवघ्या पावणे दोन तासांत पार करता येणार आहे. यामुळे प्रवासाचा वेळ तब्बल 10 तासांनी कमी होणार आहे.
मुख्यमंत्र्यांनी या विमानतळाच्या विस्ताराच्या योजनाही उघड केल्या. भविष्यात येथे 3000 मीटर लांबीची धावपट्टी उभारण्यात येणार आहे, जेणेकरून कोणतेही मोठे विमान इथे उतरू शकेल. विमानतळाची कनेक्टिव्हिटी वाढवली तर तेथील उद्योगधंद्यांनाही चालना मिळते, याकडे त्यांनी लक्ष वेधलं.
अमरावतीत सुरु होणाऱ्या पायलट ट्रेनिंग स्कूलमुळे या शहराला आंतरराष्ट्रीय ओळख मिळणार आहे. दरवर्षी सुमारे 180 प्रशिक्षणार्थी पायलट इथून तयार होतील. सुमारे 34 प्रशिक्षण विमाने इथे पार्क होतील. हे संपूर्ण प्रकल्प दक्षिण आशियातील सर्वात मोठ्या प्रशिक्षण केंद्रांपैकी एक असेल, असा विश्वास फडणवीस यांनी व्यक्त केला.
तसंच, अमरावतीत टेक्स्टाईल पार्क सुरु होणार असून यामुळे सुमारे दोन लाख लोकांना रोजगार उपलब्ध होणार आहे. कापूस उत्पादक शेतकऱ्यांनाही या माध्यमातून फायदा होईल. त्याचबरोबर मेडिकल कॉलेज, आयटी पार्क यांसारख्या योजनांचंही मुख्यमंत्री फडणवीस यांनी आश्वासन दिलं.
वाढवण बंदर, जेएनपीटीसह विदर्भाला जोडण्याचं काम देखील वेगात सुरू असल्याचं त्यांनी स्पष्ट केलं. हे सगळे बदल अमरावतीच्या औद्योगिक आणि आर्थिक विकासासाठी अत्यंत महत्त्वाचे ठरणार आहेत.
अमरावती आता केवळ एक जिल्हा राहिलेला नाही, तर विकासाच्या नव्या पर्वाकडे वाटचाल करणारा महत्त्वाचा केंद्रबिंदू ठरणार आहे. मुख्यमंत्री फडणवीस यांच्या नेतृत्वात, केंद्र आणि राज्य सरकारच्या सहकार्यानं, या शहराला नवी ओळख आणि नवसंजीवनी मिळत आहे.